PrUB1390.04.13

Libin vrunde.

Als ir uns vormols gescrebin habit, begerende czu wissen von uns, worumme wir den uwirn^a) di zee hetten vorboten, doroff wir uwir liben wider screbin¹⁾ eczlichen gebrechen,^b), domite ir di unsirn czu uch besweret habit eczliche jor, dorumme unsir herre der homeister durch bete willen unde nucz unsir und ziner andern stete dis landis unde mit unsir gemeynen eyntracht allin gesten dis landis di ze hat vorboten, off welche unsir entworte ir uns dor noch screbet begerende, das wir den unsirn, di czu uch off uwirn jormarct czu Mitfasten²⁾ wu^erden czhien, wolden befelen und macht gebin, mit uch von zulchen zachen czu reden etc.: doroff wisse uwir libe, alleyne wir alle cziit gerne erbeiten unde reden czu vride, czu gemache unde czu gutir eyntracht, doch en torste wir di zache alleyne off uns nicht nemen, wir en hetten zi vor unsirm herren den homeister und den andern steten dis landis vorgelegit. Also zi wir nu am donrestage noch Ostirn³⁾ bi unsirm herren und den steten gewest und habin alle zache und uwir begerunge mit yn geret, und unsirs herren und unsir allir wille ist, mit uch vruntschaft unde eyntracht czu habin und czu halden, als is von aldirs czusschen uns gewest ist.

Dorumme ab is uch bequeme und nu^ecze donkit, das wir beiderziit durch der zache willen czuzamene komen czu Konyn adir czu Kalis, und doroff eynen bequemen tag nemit und uns den bi cziten genug lot wissen, so wellen wir gerne di unsirn dor czu uch senden, czu vorzuchen, ab wir unsirn nucz und vromen do beiderziit obireyntragen und {S. 445} gewerben mochten. Were ouch ymand der uwirn, der her yns lant czhien wurde, dem ir is befelen woldet, hi mit uns czu reden und czu enden, und wir beiderzit unsir mu^ee behalden mochten, das zege wir ouch gerne. Doroff bitte wir uwir entworte bi desim keginwertigen boten. Obir alle ding, libin vrunde, dunkit uch, das wir unsir ding mit briven mochten undirscriben und vorrichten, das wir beiderziit nicht mit so grosser ebinture czuzamene en du^erften ziten, wente ir wol wessit, wi is stet czusschen disen landen, das lot uns uwir meynunge wissen bi desim boten.

Datum^c) anno [13]90, feria quarta post quasimodogeniti.