PrUB1390.03.00

Libin frunde.

Wisset, das wir uwirn briff wol vornomen habin mit disem keginwertigen botin uns gesand, in welchin briffin ir uns undir andern reden hat geschrebin, das ir mit uns siit in der Hense, ouch das wir den uwirn dy zee vorbotin habin; warumme wir das getan habin, begert ir unsir antworte. Hirumme, libin frunde, uch ist wol wissintlich, wy das unsir burgir kowfflute von alders czu uch in vrien jarmarkten handelung habin gehat in kowffin und vorkowffin ane allirley beswerunge, dorobir dy unsirn in korczin jaren von uch mit ma[n]chirhande nuwen saczunge[n] beswert und eygint sint, also das unsir burgir undir vir laken, halbe laken und harras alenczil und andir war nicht vorkowffin mochtin noch [tragin].^a)

Dorumme wir uch ufft und dicke unsir brive geschrebin habin und unsir botin an den irluchtigin fursten, den Romuschin konig, und an uch in grossir koste und czerunge gesant habin, der uns eyne genedege antworte schreib in synen briven, das ir uns by alder vriheit und guter wonheid czu blibin soldet lassin, dy czwuschen uns fruntlichin wer gehaldin.²⁾

Das uns allis von uch bisher nicht gebessert mochte werdin, und andir stete doby by czeithin han genomen und nemen, uns untregeliche borden ufflegin und nuwe saczunge dirdenken, dorynne unsir burgir kowfflute groschlich in koffin und vorkowffin nedirgedrukt werden. Und dorumme unsir herre der homeister sine armen lute in eczwas narunge czu behaldin und czu besorgin, mit eyntracht syner stete dis landes hat vorbotin, das keyn gast czu lande noch wassir sin gut vorder furen sal denne hir in dis land czu Prussen.³⁾ Hirynne noch lut dis gebotis uwir wisscheit wol dirkennin mag, das dis gebot dy Hense in keynen wiis nicht [rurit]^b), sundir was dy Hense und des kowffmans vriheit undo recht anrurende ist, do wolde wir uch und dy uwirn, weys Got, ungerne hindern, sunder sy czu vordern sullin unde wollin in alle unsirm vormogen, der glich wir ouch von uch sint begernde uns und den unserin czu irscheynen.