1357.01.20.

Honorabilibus ac circumspectis viris schabinis et consulibus in Campen, nostris amicis dilectis, presentetur.

Unsen vruntliken grut tovorn.

Leven besunderen vrunde, juwer erbarheyt danke wi sere grotliken umme juwen guden willen unde woldaet, de gi uns bewiset hebben in deme, dat gi bearbeydet hebben by juwem ersammen heren bisschoppe tUtrecht an der sake Johans sone Hermans van Kuenre. Unde, leven vrunde, alse gi uns latest schreven, dat de zulve Johan wolde sik beraden bette to Mydwinter neghest vorghan(2) unde jw denne zin beraet secghen, bidde wi vruntliken, oft Johan vorbenomt jw dat beraet ghesecht hebbe, dat gi uns dat willen weten laten, unde dat gi vordan juwe beste daryn don dor unsen willen unde wesen unsen borgheren to vordernisse, wor gi moghen. Dat wille wi gherne truweliken alleweghe wedder vordenen an jw unde an den juwen in liken oft in groteren saken. Siid Gode bevolen.

Schreven in sunte Fabianes unde Sebastianes avende under unserm secrete.