Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
356-Elections 12
[o1v]
Frere Jacques de Milly maistre
xii. De l’election du procureur general de court de Romme
On doit à bonne cause honorer et reverir la cité de Romme en la quelle le vicaire de Nostre Saulveur preside à l’esglise catholicque, où le procureur general de nostre ordre doit demourer pour la deffence de la liberté d’icelluy, qui par ses bonnes meurs, approuvée vie et experience des affaires face honneur et prouffit à nostre religion. Lequel procureur en chascun chappitre general s’entend estre revocqué et aultre en son lieu soit ordonné. Neantmoins se plaist au maistre et couvent pour certaines causes entre le terme des chappitres generaulx, non obstant la institucion de procureur faicte par chappitre, revocquant ledit procureur, puissent pourveoir d’autre. Et le maistre adoncques et conseil en la institucion du procureur general doyent diligamment veoir et meurement pourveoir que eslisent en procureur general ung religieux digne et saige et bien merent, qui doit demourer en court de Romme, orné et habillié de honnestes vestemens, deffendant les previleiges, grâces et libertés de nostre religion ensemble les collacions, donacions et provisions du maistre et couvent, contredisant vigoreusement aux rebelles et desobeissans et iceulx persequutant, les obeissans adjudant ; aussi doye diligemment par ses lectres adviser le maistre et couvent ; et que soit content des gaiges de nostre [o2r] commun tresor, sans riens demander de noz freres pour son labeur et peine ; honnorant les ambassadeurs que manderons à Romme ; portant(a) humble reverence à nostre Saint Pere et honorer les tresreverends seigneurs cardinaulx, evesques et curialx pour iceulx maintenir, garder et avoir en benivolence et amour.
Next Elections 13 | Back to the Contents