Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
085-Hospitalité 10
[f5r]
Frere Jehan de Lastic maistre
x. Que l’enfermier chascune nuyt visite les malades et les pourveoie de bonnes viandes
Il appartient que l’enfermier soit diligent envers la santé des malades affin que par negligence aulcun sinistre ne puist advenir. Et pourtant nous commandons que chascune nuyt l’enfermier acompaigné d’un feal serviteur à heure de complye et du point du jour bien, prudentement et discretement doient visiter les malades, parler à eulx, exorter, corroborer et ayder. Et les preudommes le jour ensuyvant doyent demander se l’enfermier a comply la visitation. En laquelle se fauldra le doyent reprendre et contraindre à le faire ; et se recusera que doient pourveoir autrement en sa reprehention. En oultre pource que de tant que les viandes sont plus pures et meilleurs de tant elles donnent meilleur nourrissement au corps humain pourtant nous commandons à l’enfermier que doye pourveoir de meilleurs viandes que possible sera comme poullailles, gelines, pain et vin. En laquelle chose l’hospitalier et preudommes facent bonne diligence affin que lesdictez choses subveigne.
Next Hospitalité 11 | Back to the Contents