PrUB, MS 8

{Überlieferung}
A = OBA 15997.

{Drucklegungen}
--.

{Regest}
JH I 15997.

{Diplomatische Erörterung des Stücks}
Originalbrief auf Papier.

Wylligen und fruntlichen dinst czuvor: Ersamer geystlichyr lieber her hauszkomptur, noch deme ich am nehestin mit dem thumproboste und mit euch gereth habe von der czweytracht, die vor eynem iore die hern gutten leuthe mit das hern byschouffen gnode gehat haben, was ich aldo vor euch meyns hern gnode zcu gesagt habe, sal ouff gotwil wol gehalden werden. Euch ist wol wyssentlich zcu gutter mosin, das uns do her kegen dem Heyligenbeyl zcu gesagt seyn vunff leste ragken die denn^e bey euch inne legen alse ich undir richt byn umb semelichen ragken itczunder eyn mol czwer bestalt haben, der uns her nicht gefallen ist. So vorstee ich wol, das man eyne vorschreybunge begeret von den herrn gutten leuthen und mir. Sulche vorschreybunge geschyt in worheyt nicht, wen sich die hern gutten leute von dem korne ane ander houlffe und reth nicht anthalden konnen, wurime euch also meynen herrn besunderen gutten frunt mit fleysse bytte der in helffen und rethin waldt, das sulch korn ane behemmunge und fforder stoppen den hern gutten leuthin wirden mochte, das ich mit sampt den hern gutten leuten umb ewers ordens capittel und kyrche ffruntlichin vordinen will. Geben zcum Heyligenbeyl am Sontage noch Martini Episcopi im LXV^ten iare.