PrUB, JS 417

{Überlieferung}
B = OF 2c, p. 177 [olim Registrant des Hochmeisters Konrad von Jungingen, Nro. II, fol. 87r].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 74.

{Diplomatische Erörterung des Stücks}
Gleichzeitige Abschrift, Papier.

Irluchter furste, grosmechtiger herre, euwern brief uns gesant habin wir wol vornomen, in deme uns euwir durchluchtikeit schreibet begerende, das wir euch volgeten von staden vor dy Dober, als wir vordirste mochten. Lieber herre, als wir euwir grosmechtikeit ouch letczt bie euwerm boten geschrieben habin und ouch mit euwern mannen ein semelichs wol geredt habin, atzo thun wir euwir herlichkeit ouch abir czu wissen, das wir euch keyns unser heer durch und in euwir landt furen mogen, wend wir des nicht mochten dar brengen ane grosen schaden der euwir und ander lute, durch der landt wir czien worden. Ouch so habin wir uns ken den selben euwir hirlichkeit luten und widdersachin noch nicht alzo vorwart, das wir mit iren czu desir cziet uff sie czien mochten.
Ouch liber herre, stet uns dys nicht czu gedenken, das wir euch selber das gelobet hetten, do wir letczte bie enander woren, das wir euwir hirlichkeit mit imandes volgen welden. Und dorumb, lieber herre, bitten wir euwir grosmechikeit, das ir uns des nicht vorobil habet, wendt wir alsust gerne thun welden alles, das wir durch euwir hirlichkeit wille billich thun sollen und mogen.
Gegeben czu Virczighuben am Montage vor Assumpcionis Marie [1398].