PrUB, JS 348

{Überlieferung}
B = OF 2c, p. 154-55 [olim Registrant des Hochmeisters Konrad von Jungingen, Nro. II, fol. 73v-74r].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 63-64.

{Diplomatische Erörterung des Stücks}
Gleichzeitige Abschrift, Papier.

Unsern fruntlichen grus czuvor.
Lieber her gebitiger, wir danken uch der muwe, die ir gehabt hat umb den brieff unser gnedigen herren der korfursten an die konigynne {S. 64} von Polan, des usschrift ir wol habit. Nu wisset, daz bynnen der czeit, e uns der brieff worden ist, die konigynne in grosen ungnaden ist des koniges und ouch etliche dy besten syner houbtluten, dy her uch dorumme entsaczet hat von eren ampt, das sie nicht volbort im geben wolden czu jare, wen her wolde uns haben obirczogen mit Polan, Littowen, Tattarn und Rusen. Und das hyndert dy konigynne mit etlichen houbtluten, und die konigynne, das got gelowbit sy, dem orden wol gefallen ist und suchet unser bestes. Durch des willen torften wir ir muwen mit dem briefe, wen wir vorchten, sie qweme do von in grosser nod und ungnade, wen is itzunt obel stet in dem ryche czu Polan.
Doch hetten wirs vor vorsonnen, so were is besser gewest, das der brief gerade ir komen were von deutschen landen von unsern gnedigen herren, so hette is gehat eyne besser gestalt an unser vordacht. Noch der czeit als wir haben vornomen, das unsere herren by den andern synt, als der Romische konig und die korfursten, und mechticlicher man des ordens sache ustragen mag iczunt, wen unser gnedige herre der Romische konig in kegenwertigkeit unser gnedigen herren der korfursten bas czu semelichen sachen geneyget mus sien, wen sie den cristengelowben und cristenheit anhoret, wen das her alleyne were.
Dorumme so dunket uns geraten, das ir die sache vornuwet unsern gnedigen herren, die ir vor vor sy gebracht hat, und ouch die artikel, die wir uch hy senden vorslossen, anrurende den konig von Polan, Wytawten und ouch von Stetyn. Und den syn brengit czu korczen worten, wen sie nicht gerne vil worte horen, und bittet sie mit flize, das sie ernstlich doruff gedenken und dorczu ere hulfe thun schribende und droende. Und underwiset sie kunlich, wo sie is nicht by czeiten thun, daz do von mag entsteen korczlich eyn gros schade und eyn unvorwyntlicher der heiligen cristenheit. Und ab sie briefe senden wellen, die schicket von in gerade czu, und daz lon wir gerne beczalen wellen, was das kost.
Und lieber her Gebitiger, thun die muwe uvordrislich, wen do macht an liet und seyt flisig sie underczuwisen, besunder ader in der gemeyne, wy ir daz allirbeste czu wege mogit brengen. Und das das yo geschee ernstlich, und das wellen wir uch gerne danken mit unsern gebitigern. Wy die briefe luten werden, das seczen wir czu unsern herren, wen sie ouch vormols etliche sachen haben vorhort, und daz yo deme konige von Polan ernstlich vorschreben werde und dem von Stetin.
Geben czu Marienburg am Sontag Invocavit anno domini etc. XCVIII.