PrUB, JS 266

1403 April 3. Schlochau.

{Regest}
Hochmeister [Konrad von Jungingen] an den Herzog von [Pommern-]Stettin: fordert ihn auf, seine Lehnsleute, die an Ermordung und Beraubung der auf dem Weg nach Preußen befindlichen Söldner auf ihrem Zug durch Pommern teilgenommen hatten, zur Sühne und zur Freilassung der Gefangenen anzuhalten.

{Überlieferung}
B = OF 3, p. 125 [olim Registrant des Hochmeisters Konrad von Jungingen, Nro. 1b, fol. 59].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 153-54.

{Diplomatische Erörterung des Stücks}
Gleichzeitige Abschrift, Papier.

Dem herczogen von Stetyn.

Irluchter forste und grosmechtiger besunder herre.
Wir clagen euwer durchluchtikeit als unserm besunderm herren und des rechten liphaber, den jamerlichin und unerlichin mort und rerowp, der leyder nulich gescheen ist in dem lande der Obirswynschen herczogen an erbarn rittern und knechten, die unsere landt mit grosser muwe und swerer arbeyt gesucht haben, nicht anders wenne umb Gotis und ere wille, die heydenschafft czu swechen und die heilge cristenheit czu stercken. Do bey, als wir eygentlich underricht sint, etliche euwir manne, die ir lehene und guter von euch entphaen und in euwerm lande sint gesessen, als obiltetige mittehelffer gewesen sint, und dy selben geste widder ere und recht, ane alle scholt haben helffen morden und vahen, und der selbin eyns teils off iren slossern noch gefangen halden, umb keyner andern sache wille, denne umb ire habe und gut, das sie czu semlichin uneren und bosheit hat gebracht.
Hirumb, grosmechtiger liber herre, wend wir von euwir herlichkeit alle czeit vormerte rede haben gehort, das ir y redlichkeit ere und gerechtikeit habt gelibet, so schriben wir euch in grosser wemutikeit dese yemerige unde unbarmherczige untat, die an den erbarn herren so gar unschuldiclich ist gescheen. Und bitten euwir grosmechtikeit als unsern liben herrn, das irs gerucht ernstlichin czu herczen nemen, und wellet umb Gotis und umb des gerechtes wille euwir manne, die do mete gewest sint in sulchem ernste hertlich underweisen und dorczu halden, das sie den mort und rowp widder ere und recht von in getan, vorsunen als is moglich is und czu genuge widder thun, und nemelich die geste die sie gefangen haben, ledig und frey lassen. Gerucht euch von euwir angebornen gute kegen in also beweisen, das wir dirfaren mogen, das euwir hulffe den selbin gesten vorderlich sey gewest, als wir euch wol czugetruwen. Und weres, das sie es nicht thun welden unde rechtes und eren welden in erem homute vorgeen, so wisset herre, das wir semlichin mort und rerowp allen forsten und herren, den ere und recht lip ist, clegelich schriben mussen, das den erbarn gesten von den euwern sunder alle scholt ist widderfaren, und ir keynes rechtes obir sie pflegen wellet. Und ap leichte die selbin euwir manne so mechtig weren, das sie sich an euwir underweissunge und geheisse nicht keren welden, das wir yo nicht hoffen, so gerucht uns, besunder liber herre, czu gunnen, das wir mit den unsern in euwir lant ryten mogen. So wellen wir Got den herren czu hulffe nemen und semliche rowber und morder suchen und vorsuchen, ap wir sie czu gliche und recht brengen und sulche ungute an in gerechen mogen. Und ap in sulche czoge euwir herlichkeit euwirn steten ader mannen eyngerley schaden geschege, das uns doch leyt were, so wisset das is anders nicht geschit, denne umb der obgeschriben sache wille und bitten desses brieffs eyne unvorczogen antwert uns czu schriben.
Gegeben off unserm huse Slochow am Dinstage noch Judica im XIIII^C und dryten jare.

Zitieren dieser Edition: (1) virtuell: URL (http://www.spaetmittelalter.uni-hamburg.de/Urkundenbuch/pub/js/js266.htm) und Datum der Einsichtnahme; (2) im Druck: PrUB, JS 266 (1403 April 3. Schlochau.)
Bearbeitungsstand: Text eingegeben (Jürgen Sarnowsky, 18.7.2001 [Regest]; Sebastian Kubon, 15.5.2003 [Quelle]) – Datum überprüft (Jürgen Sarnowsky, 18.7.2001) – Text mit PrUB oder sonst Druck kollationiert (Sebastian Kubon, 15.5.2003) – Text mit Or. kollationiert () – äußere Merkmale beschrieben ()

Datum der Erstanlage: Dienstag, 18. Juli 2001 — Letzte Änderung: 21. Mai 2003 von Jürgen Sarnowsky

Zurück zur Hamburger Homepage / zurück zur Regestenliste für 1403.