PrUB, JS 257

{Überlieferung}
B = OF 3, p. 137-38 [olim Registrant des Hochmeisters Konrad von Jungingen, Nro. 1b, fol. 65].

{Drucklegungen}
aus B Codex Diplomaticus Prussicus. Urkundensammlung zur älteren Geschichte Preußens, hrsg. v. J. Voigt, Bd. 6, 1861, ND Osnabrück 1965, S. 165-66.

{Diplomatische Erörterung des Stücks}
Gleichzeitige Abschrift, Papier.

Reverende pater et domine singulariter dilecte,
Significamus paternitati vestre reverende, quod subditi nostri cives civitatis nostre Thorun conquesti sunt coram nobis lugubri voce vicibus iteratis, qualiter cives Cracoviensis certa ipsorum bona receperint sub amica confidencia et bona fide propter statuta ob commodum et profectum terrarum nostrarum per nos facta indifferenter, tamen quo ad omnes terras nostras mercanciis perquirere volentes, tam per terras quam per acquas. Hoc ipsum subditi nostri coram serenissimo domino nostro rege Polonie exposuerunt cum querela, qui respondens dixit, se ex eo dolere et quod factum sic commissum perpetartum sit a civibus Cracoviensibus absque scitu suo. Postmodum reverendissimo patri domino archiepiscopo Gneznensi nobis presencialiter coexistente desideranter supplicavimus, ut causam ipsam ad dicti domini regis audienciam deduceret, suditisque nostris benignis auxiliis, ut bona ipsis ablata restituentur, favorabiliter subvenire dignaretur. Addicientes, si quid statuto nostro a nobis instituto impossibilitatis contra regnum Polonie obviaret, de quo nobis potestas non competeret, quod libenter informacione previa nobis facta remandare voluissemus id, quod illicitum in mandato nostro conseretur, consimile nobis fieri optantes, si quidquam talium contra terras nostras fuisset attemptatum. Adiungentes insuper, si cives Cracoviensis accionem vel impeticionem aliquam haberent adversus homines nostros, quod iidem nostri subditi ipsis Cracoviensibus equalitatis servata mensura penitus satisfacere debuissent, tales et quamplures exhibiciones amicabiles, de quibus scribere nimis foret prolixum, exilis hucusque iuvaminis nobis et nostris exstiterunt.
Sed dicta causa de die in diem protrahitur et subditis - prochdolor - in grave ipsorum preiudicium bona ipsorum detinentur, cum certe, venerabilis pater, eadem ipsorum bona corrupcioni sint propinqua, nec sine ingenti nostrorum dampno poterunt ad aliter longum tempus reservari. Et timendum est, quod si, quod absit, brevi temporis curriculo subditis nostris restitui negligantur, eosdem nostros homines irrecuperabilia dampna subicerentur. Quare, reverende pater, quia de paternitatis vestre gracia singularem gerimus fiduciam, ideo vestre dominacioni attentis precibus uti favoroso nostro domino supplicamus cum affectu, quatenus Dei intuitu et iusticie piis vestris subsidiis pauperibus nostris hominibus graciosius cooperari velitis, ut bona ipsorum absque dilacione ampliori a civibus Cracoviensibus restituantur, quamquam licitum est ipsis, et reddantur, si concedente domino, reverencie vestre ad beneplacita vestra unquam obsequiis nostris complacere debebimus iuxta omnem possibilitatem indubie faciemus, cum utique subditi nostri multis viis possibilibus versus Cracovienses se paratos exhibicionibus benivolis rediderunt, quas iidem Cracovienses reiciunt et anullant. Nec tamen nostros aliqua culpe macula, duntaxat racione mandati a nobis instituti, de quo supra percepimus, possunt denigare, quod si ex parte nostri quanquam non confidimus homines nostri dampna sufferre angerentur, molestia exinde non modica cor nostrum nulli dubium certissime gravaretur, responsum petimus cum latore nobis presencium rescribendum.
Datum in castro nostro Stumis feria secunda post festum Assumpcionis Marie virginis gloriose anno CCCC^mo tercio.