PrUB, JS-JP 53

{Überlieferung}
B = K. Bibl. Berlin, Manuscr. lat. Fol. Nr. 385.

{Drucklegungen}
Aus B Hansisches Urkundenbuch, Bd. 4 (1361-1392), bearb. v. Karl Kunze, Halle a. S. 1896, Nr. 925, S. 392-393.

{Diplomatische Erörterung des Stücks}
Abschrift aus dem Public Record Office London.

Plese a consail nostre seigneur le roi granter briefs pour repaiement dez deniers des marchantz de Pruys, que furent prisez par mandement nostre dit seigneur hors del ville de Lenne pour lambassatrie devers la dite terre de Pruys, en manere qensuyt.

[1.] Soient briefs nostre dit seigneur enveiez as maires et baillifs dez villez contenuz en un rolle, qui ent sera delivre a dit consail, ove cedules des sommes et nouns en mesme le rolle contenuz deins icellez briefs closez, pour livrer les ditz sommes si en haste, come donques puissent, sur les ligeances, come ils voillent eschivre grevouse indignacion devers nostre dit seigneur le roi, chargeantz les dettes¹⁾ dicellez sommes sur peyne de forfaire tant, come ils puissent forfaire devers nostre dit seigneur, de paier lez sommes, que sur eux as costages du dit ambassatrie sont assiz, a Johan de Brunham jadis maire, Johan Drolle et Johan Prentys, baillifs de Lenne, devant lez oytaves de seynt Hilleir proschein venant²⁾ a plus tarde, issint qils a quelle hure, que lez ditz marchauntz de Pruys demandent repaiement de lour monoie susdite, puissent repaier mesme lour dite monoie sanz delay ou tarrier quiconqe, quelle ne puisse estre faite sans hastife levee susdite. [Et] que mesmes lez ditz mairs et baillifs certifient a consail nostre dit seigneur les nouns deins lours baillies comprisez en le dit rolle, que ne fount lour paiementz al jour devant limitee. Et si ascune soit trovee contrarous ou rebelle e[t] delaiable en son paiement susdite, de lui assigner jour devant le dit consail, a rescevere ceo, que par le dit consail pur sa rebeltee et delay susdite ent sera agarde; issint que pour defaute de nounpaiement ou delay as ditz marchantz de Pruys ascune debate ne sourde de novelle, que Dieu defende.

[2.] Item soi[en]t autre[s] briefs direitz as ditz Johan de Brunham, Johan Drolle et Johan Prentys ov[e] un rolle entier de somme touchant lez costages de lambassatrie susdite, de rescevere dez gentz contenuz en le dit rolle lez sommes sur eux assis pour la dite ambassatrie. Et qils soient chargez fermement par mesme le[s] briefs de paier a nostre seigneur le roi 143 lv. 13 s. 10 d., quelle nostre dit seigneur paia a Gerde Ekenbroke et Johan Whitte, marchantz de Pruys, pour deniers de eux arestez en la dite ville de Lenne, le septisme jour de seint Hiller³⁾ a plus tarde en cas, que leur soit paie atant dargent de lour resceite susdite; et sils ne soient paiez del somme contenuz en lour dite rolle devant le dite jour, pour quelle cause si bien nostre dit seigneur come les gentz de Pruys, que unquore sont appaiers de lour deniers en la ditte ville arestez, ne puissent estre paiez, adonques soient chargez de certifier a conseil nostre dit seigneur le roi lez nouns dicellez gentz, que ne fount lour paiementz a jour susdite, assint que nostre dit seigneur par avys {S. 393} de son conseil puisse ent ordiner remedie pour le plus et hastif levee des sommes issi adereres en esploit de[s] repaiementz susdites.

¹⁾ dettes = debiteurs.

²⁾ [1389] Januar 20.

³⁾ [1389] Januar 19.