PrUB, JS-JL 23

{Diplomatische Erörterung des Stücks}
Register-Überlieferung, Abschrift. 

Irluchter fürste grosmechtiger gnediger herre.
Also als euwir grosm[echtige] gnade den edeln Gunthern von Hugwicz, euwern getruwen, euwern botschaft und meynunge wol underrichtet mit eyme credence brive czu unserm homeister seliges gedechtnis hat gesant, welchen brieff der voit von Roghusen und wir wirdiglich han entpfangen und euwer botschafft gu^etlich uffgenomen. Der selbe egeschriben Gunther hat an uns von euwer wegen gebracht und vorgelegt, wie das euwer grosmechtige herlichkeit durch etlicher redlicher schelunge willen hat mit dem konige und konigrich czu Polan eynen krig anczuslan und begerende syt, was hu^elffe trostes und rats euwer gnade von unserm homeister und von dem Orden darczu mu^echte haben und wes sich euwer gnade czu im darczu sulle vorsehen.
Grosm[echtiger] gnediger herre, uff sulche botschafft, die der egenant Gunther an uns von euwer wegen hat geworben, ku^enne wir euwern gnaden keyne usrichtige antwurt czu dieser cziet geben, want unser homeister seliges gedechtnis leider von desir werld ist vorscheiden. Sunder wen es so verre kumpt mit hu^elfe unsers herren, das der orden eyn houpt haben wirt, so mag euwer gnade sulche botschafft an in thun. So hoffe wir, das derselbe czuku^enfftige unser homeister denne euwern gnaden wol wirt eyne antwurt weder daruff schriben, darnach sich euwer gnade denne wol mag richten. Ku^enne wir ouch denne icht guts darczu thun euwern gnaden czu dinste, das welle wir williglich und unvordrossen alle wege gerne thun, und gebitet an uns als an euwern besundern sunderlichen undertanigen. {Datierung} Datum Stumis proxima feria sexta post Egidii abbatis¹⁾.

¹⁾ [1390] September 2.