PrUB1438.04.13

Wir b[ruder] P[aul] von R[usdorf] h[omeister] etc. thun kund und offenbar allen, den disse schriffte werden vorbracht, das nach dem, als denne die ersamen und geistlichen bruder Walther vom Loo czu Revel, Mattis von Bonigen czu Goldingen, Hans Schaffhuwssen zu Asscheraden, Heinrich Slerogner czur Mittaw, unsers ordens kompthure in Lieffland ^a)mit der kore^a) und umbe bestetegung wille eynes nuwen obirsten gebietegers in Lieffland hie bie uns und unsern gebietegern, nach gutter alder gewonheit sein gewesen in botschafft, haben wir nach rathe, willen unde volborth unsers raths gebieteger[e] die ersamen und geistliche unsers ordens bruder Heinrich Rewss von Plauwen obirster spitaler und czum Elbing[e], und Hans von Schauwenburg czu Rangnith kumpthur, disse beweiser gefertiget und volmechtiget,und mechtigen die ouch in crafft disses brieffes, so das sie nach erem besten dirkenntnisse den gebietegern unsers ordens, und den landen Lieffland [v. unten] ^b)und unserm orden czu gedeigen und czu nutcze eynen nuwen gebietiger zu Lieffland^b) us der berur[ten] kore von unser wegen erwelen, annamen und bestetigen mogen. Und was in sulcher bestetegung[e] eyns nuwen gebietegers zu Lieffland / durch die vorbenumpten unsers ordens kompthure czum Elbing[e] und czu Rangnith wirt gethan und geendet, glowben wir bruder Pauwel homeister obenberurt mitsampt unsern gebietigern stete, feste, crefftig und unvorrucket czu halden. Des zu merer sicherheit etc.