PrUB1438.03.03

Schuldige al unsers vormogens dirbitunge steticlich vorempfangen. Aller erwirdigister vater, grosmechtiger, gnediger, lieber herre.

Uns hath Hans Woldecke uns[er] stadt Dantczk inwoner und lieber getruwer, disser beweyszer vorbracht, wie her mit eyme euwer herlikeit stadt Paderborn inwohner^a) unde burger seyne sache, die her mit demselben czu thun hatte, durch eyn recht gewonne[n] und sust ouch ander schelungen und sachen dorselbist czu Paderborne habe. Und wie wol euwer gros[mechti]keit vor den selben Hans getruwlich gnug, das wir czu male groslich euwern gnaden dancken, hath geschreben und sunderlich die sache mit allem rechte hath gewonnen, so mag em das nicht, da her recht czu hath, werden ader folgen, das wir dach g[er]ne thun wellen den euwern, als er davon eigentliche underrichtung^b) mundlich wol^c) thun wirt^d) euwer hochwürdikeyt, die wir mit sunderlichem fleysze groslich bitten, geruchet gnediger herre, nach vor den unsern czu schreyben und em getrewlich an die von Paderborn mit ernster anhaldunge weszen beholfen. Daran em, das dorczu her Recht hath und itczunt mit rechte hath gewonnen mitsampt der czerunge dar uff gelegt ane lengern^e) vorczog, muhe, czerunge unde reyszen fulgen moge^f). Mochte das yo nicht gescheen, gnediger herre, euwer gnaden lassen ir nicht seyn enkegen nach weder euch seyn, ab der unser anderswo, wie em das eben und bequeme^g) wirt seyn, dem seynen nachkomen moge. Sunder lieber herre, wellet die von Paderborn also underweyszen, das eynsulchs nicht nach thun bedorffe, wend uns Got weys von hertzen leyth wäre, das die euwern deshalben czu schaden komen sulden. Und wellet euch hirczu so^h) keenⁱ⁾ die unsern beweyszen, als wir denn[e] all wege getan haben und alczeyt den euwern thun wellen. Der almechtige Got geruche^j) euwer grosmechtikeyt in gesunder wolfart sparen und endhalden zu begerten langen czeyten.

Gegeben czu Marienburg am sonnobende vor Remi[ni]scere im xxxviii^ten jar.