PrUB1438.03.03
© Jürgen Sarnowsky, Hamburg (1999-2019)
{Regest}
{Überlieferung}
B =
{Drucklegungen}
{Regest}
{Diplomatische Erörterung des Stücks}
Wir bruder P[aul] von R[usdorf] homeister etc. thun kunt und offenbar allen, den disse schrifte werden vorbracht, wie das nach deme der irluchte und gros[mechti]ge herre, herre Sigmund grosfurste czu Littawen und Rewszen , unser besunder lieber herre die gefangenen und sunderlich Ditterich von der Reke, Heynrich Roddenberg und Poppe von Kokeritz, die alle dem ersamen und geistlichen manne, Heynrich Schungel, unsers ordens gebitteger czu Lieffland seliges gedechtenisses czugehortena) und im negs[t]geledenen streyte vor und nach von dem benumpten herren grosfursten seyn gefangen, durch unser und unser gebiteger fleysiger bete wille, erst uff Weynachten und darnach uff Vastnacht vorgangen, uff die hanth hatte gegeben und keen Lieflandt hat folgen lassen So hath nu aber der vilgedachte unser here grosfurste durch unser und unser gebitteger fleysiger bete wille die vorberurten gefangen bis uff dje negstkomende Pfingesten uff die hanth gegeben und gelassen, also bescheydenlich mogen wir und der gebittger zu Liefflandt bynnen den berurten Pfingsten umbe semliche gefangen mit dem offgedachten hern grosfursten eyns werden und eyn gut ende czur losunge treffen. So seyn sie itczunt usgegeben und geantwortet, wurde das aber, do Got vor sey nicht gescheen, / so sullen und wellen wir und der gebitger czu Lieffland mit unserm gantczen orden die selben gefangenen uff die vorgenanten Pfingesten dem herren grosfursten vorben[ant] keen Tracken widergestellen unvorczogen bie gutten truwen und ere, ane allerley infelle geistlichs ader wertlichs gerichtes. Davor [wira) mi[t]sampt unsern hie nogeschreben gebittegern als Wylhem von Helfensteyn groskumpthur, Heynrich von Rabesteyn, obirster marschalk, Heynrich Rewsz von Plauwen obirster spitteler und czum Elbinge, Walter Kirskorp obirster trappier und czu Cristburg, Conrad von Erlingshuwszen czu Thorun kumpthur, bey gutten truwenb) gentczlich glowben in crafft disses brieffes, dem wir czur merer sicherheyt mit derselben unser gebitteger ingesegel unser ingesegel haben anhangen lassen und [der] gegeben ist uff unserm hawsze Mar[ienburg] am negsten montage nach Invocavit im xxxviiiten jar[e].
b) Davor Streichung ge.
Bearbeitungsstand: Text eingegeben (Maximilian Jaede, 30.9.2019) – Datum überprüft () – Text mit PrUB oder sonst Druck kollationiert () – Text mit Or. kollationiert (Maximilian Jaede, 21.8.2019; Jürgen Sarnowsky, 19.10.2019) – äußere Merkmale beschrieben ()
Datum der Erstanlage: 19. Oktober 2019 — Letzte Änderung: 19. Oktober 2019 von Jürgen Sarnowsky
Zurück zur Hamburger Homepage / zurück zur Regestenliste für 1438.