PrUB1438.01.19

Wir b[ruder] P[aul] von R[usdorf] homeister etc. thun kunth und offinbar allen, den disze schrifte vorgebracht, das wir angesehen haben erbarkeyt, alder und getruwe arbeyt des ersamen und geistlichen mannes, bruder Arnoldes Kirskorp pristerbrudes desselben Dewtschen Ordens pfarres zu Ritczmolenheym bie Collen vor der Veelen, in welche pfarre der vorbenumpte Arnold bestetiget ist und Infestiret von dem allir erwirdigesten in Got vater und hern herren von Collen unserm gnedigen herren vor einen rechten pfarren und haben mit willen, volbort und rate unser gebitteger gegunst und erloubet und gonnen em und irlouben in craft deszes brieffes die selbge pfarre czu seyme leeben czu halden czu vorwesen und selbist czu regiren und dorinne czu thun, als her meinet, das lon von Gott dem herren czu haben. Ydoch so sal her dem kumpthur czu Covelentcz, was her en heyszet, thun, und worczu her seyn wirt bedorfen, als her denne bisher hath gethan syn gehorsam.

Des czu merer sichereheyt so habe wir unser ingesigel am dissen brieff lassen hangen, der geben ist uff unserm hawsze Elbing am sontage vor dem tage der heiligen Marterer Fabiani und Sebastiani im xxxviii^ten jar.