PrUB1438.01.16

Wir b[ruder] P[aul] von R[usdorff] homeister etc. thun kunth und offenbar allen, den disse schrifte werden vorbracht, wie das uns und unser gebittiger der erbar und geistliche bruder Johan von Meyle unsers ordens hawskumpthur czu Collen demutticlich hath gebeten, das wir em, uff das her ^a)seyn leben^a) in gotis dienste czu Collen czubrengen mochte, eyne kamer czu seynem leben czugeben und vorleigen geruchten. Also haben wir seine bete angesehen und vorleigen und gonnen em die kamer, do her itczunt inne ist, czu gebruchen, dach also bescheidenlich die weyle her mag ader kan und swacheyt ader kranckheyt halber^b) nicht ist vorhindert, so sal her unser ordens kumpthur zu Kovelentcz gehorsam, willig und unvordrossen seyn czu thun alls, das em von dem egenant[en] kumpthur zu Kovelentcz wirt geheyszen und bevolen. Und wen her eynsulchs von gebrechlikeyt wegen nicht kan noch vormag zu thun, so sol her erst die berurte kamer haben und behalden zu seyme leben.

Des zu merer sicherkeyt haben wir etc. Gegeben zum Rotenhawsze am negsten donnerstage vor Antonii im xxxviii^ten jare.