PrUB1437.12.30

Willige all unsers vormogens dirbittunge steticlich vorempfangen. Erwirdiger vater^a) und besunder lieber herre.

Wie und in welcher weyse wir vor den ersame[n] und^b) vorsichtigen Heynrich Vorrath, unser stadt Dantczk burgermeister, unsern lieben getruwen, den euwer vaterlichkeyt gefangen hathe, itczunt gefach und gar vleisseclichen euwer gutte geschreben und gebeten haben, das hath us den vorgen unsern brieff[en] euwir herlichkeyt wol vornomen. Und wie wol wir czumale fruntlich und gar demutticlich vor den unsern geschreben und ouch des unsern unschult und unvorwirkunge eygentlich gnug haben vorclaret, so befynden wir dach in der tadt, das dem unsern unsere so vleyssige bete keen euwir vaterlichkeyt nicht seyn behulflich gewesen. Und hetten ouch eynsulchs, sind wir immer mit euch und^c) den euwern iwerle nicht anders denne liebe und fruntschaft gewust haben, und beynamen, das der unser so gar unsch[uldig] wirt gefangen gehalden, nymmer gedacht nach getruwet, sunder [m...] gehofft, das sulche unschulde, der unser euwer herlichkeyt sulde dir[kant] und zu herczen genomen haben. Und sunderlich so haben wir uns kegen die^d) euwern und beynamen keen Bomgarten, vor den uns euwer gutte schr[eybet] also beweyszet, das her uns billich mag wissen czu danken. Und synd de[nne] unser schriften und hoche bethe den unsern nicht mag czu hulfe und czu frewde komen, so bitten wir euch, das ir die sachen czu ettlichen unsern hern fursten und steten euwer herlichkeyt und auch dem benumpten Nicolao von beydenteylen eben fuglich und beqweme und beydenteylen gleich gewogen czu dirkennen geben gerucht. Und wellet en uff eynsulchs uslassen und keen Monster, ader wo das euwer herlichkeyt beqweme ist, komen, das dy selben unsere herren und stete seyn recht ader unrecht mogen erkennen, uff das man der sache eyn ende gehaben moge. Was wir widder euwer hochwirdikeyt czu fruntschaft und behegelichkeyt thun konnen^e), darczu wellen wir uns willig lassen befinden noch al unserm vormogen.

Gegeben uff unsern hawsze Marienburg am negsten montage vor Circumcisionis domi[ni] im xxxviii[ten] jar[e].