PrUB1437.12.06.b

Unsern fruntlichen grus czu vor und alle gutte.

Erbar lyber her kumpthur, alz wir euch denne vor haben geschreben, das ir uns[er] weyne, dy ir uns jerlich pflichtig seyt, senden sullet etc. Also haben wir dy czwelf fuder, davor wir dach von^a) euwern vorfar keyn geldt wolden ^b)nemen, dirlassen^b) und haben Wilhelm von der Kempnath gelt gegeben, der uns davor weyne sal kouffen. ^c)Und dorumme^c) bitten wir euch nu aber mit ernsten begerungen, daz ir uns dy andern weyne schicket und^d) dy her in mit den ersten schiffen [sendet]^e), went wir dy mussen haben, und konnen ir int keynerweysz emperen. Wol haben uns dy geistlichen [mannen]^f), als bruder Johan van Myle scheffer czu Kovelentcz und bruder Arnold pfarrer czu Mo^ulhen, dy ir czu uns gesanth hattet, dirczalt, wie das ir uns semliche weine itzunt nicht vormoget czu senden. Nu mussen wir durch daz jar faste vil tage hin und her halden und werden gefach mit mancherley gesten besucht und obirczogen und werden auch mit den heren konig[e] czu Polan und mit andern hern und fursten tagelasten. Sulden wir denne unser weyne^g)> nicht haben, erkennet selbir, wy gefuglich uns daz were. Und darumb so thut, wy ir moget. und bestellet, das ir uns semliche weyne, dy auch gut seyn und dy farbe nicht vorschiessen, mit den ersten schiffen, alz berurt ist, gewislich und^h) unvorzuglich sendet. Und alz ir uns hath geschreben von bruder Heynrichs wegen van Ryle unsers ordens rentmeister zu Mecheln etc., also bitten wir euch, daz ir den fertiget und en uns her in sendet. Wir wellen euch wol umb[e] eynen andern bestellen, der euch wol nutcze werden moge.

Gegeben zu Marienburg am tage Nicolai im xxxvii^ten jar.