PrUB1436.01.11

Lyeben getrauwen.

Als ir wisset, wie die unsirn nu nehst umbe beteidunge wille eyns ewigen fredes mit des reichs czu Polan rethen seyn vorsamelt geweszt czum Bryszke und durch die hulfe und gnade gotes czwusschen uns, unsirm Orden, allen unsirn landen und dem reich czu Polan gemachet und beteidingt haben eynen ewigen frede, so doch das dis herren disses landes prelaten, unsir gebietiger, lande und stete seyn eyns wurden und vorliebet haben, das man umbe semlichs fredes merer sicherheit eyne nemliche summa geldes uff czwene tage sal geben ¹⁾ und usrichten den Polan, die wir got weys mit nichte konnen noch wissen usczurichten, und als nu die czeit der beczalunge gancz kurcz ist, so bitten wir euch mit ganczem begeren, das ir euwir stad gemeyne yo ee yo bessir czusampne bebotet, en desse sachen mit gutten, so ir getruwlichste moget, vorleget, sie dorczu reysende und irmanende, das sie, synd ymmer eyn sulchs umbe des besten willen und all disser lande czunemen und gedeyen ist gescheen, ere hulfe und stewr czu semlichs geldes usrichtunge reichen und metheteilen, wend wie das nicht geschege, so kunde noch mochte semliche summa geldes mit nichte usgerichtet, deshalben derselbe ewige frede nicht kunde eynen vortgang haben noch volfuret werden, und sunderlich alle muh, czerunge und arbeid muste seyn vorloren.

Wellet euch, lieben getrauwen, yo gutwillig hirczu lassen befynden, und czwene euwirs raths mechtigen und die also fertigen, das sie als von [hie]^a) bis Donnerstag nestkomende vort obir vierczen tage²⁾ uff den abend mit voller macht bey uns seyn czum Elbinge gewislich und unvorczogen und alda mitsampt andern, die ouch do seyn werden, entlich helfen besliessen und eyns werden, wie man es mit semlicher hulfe und stewr czu usrichtunge der berurten summa sulle halden.

Geben czu Marienburg am Midwoch noch Epiphanie domini im 36. jare ³⁾.

Sunderlich begeren wir, lieben getrauwen, das ir euch ouch mit allerley schriften, registern und andern czubehorungen also dorezu schicket, das ir uns denne ouch und unsirn gebietigern als von der muntcze wegen, die ir sust lange habt innegehabt, aldo rechenschafft thuen moget.