PrUB6.1.4

In dem namen Gotes amen.

Kuntlichin si allin, di do vernemen den keginwertigin brief, das H[er]man Unrue und sinen erbin was gegebin ein kreczmer und 1 hube ackirs zcu Pradow, und das was en unvorbrivet und hattins zcu Pruschem rechte; und des habe wir bruder Hennink Schindekop obirster marschalk des ordins der brudere vorne Dutschin huse das vorgesprochin gut gebessert von vorhengnisse des erbarin und des geistlichin mannes bruder Winrichis von Knipprodin horneister des ordins und ouch von rate unsere brudere und durch sunderlicher gunst und bete willin und vorlihen es en nu zcu colmischem rechte eweclichin zcu besiczin vri. Ouch sullin si hab in gemeyne vyweide und holczunge zcu irem nucze mit den dorfern, die en gesessen sin; und ouch hat ymant eczwaz zcu en zcu vorderen, des sullin si vor voyte gesten zcu gerichte; und durch disser vorlihunge willin, so sullin si uns zcinsin alle iar uff Martini vom kreczmer und von der 1 hubin ackirs zcw mark und zcw hunere; und des habe wir zcu gezcugnisse unser ingesigel ane dissen brief gehangin,

der da ist gegebin zcu Kunigisb[er]g uff den suntag vor sente Pawels tag der bekerunge anno LXIIo.

und daz gezchugin unsere vil libin brudere bruder Rutgh[er] von Elner voyt zcu Samlant v, bruder Ditrich Laran huskumthur zcu Kunig[isberg], bruder Burchart von Mansvelt unser kumpan, bruder Henrich von Bullindorff des vorgenanten voytes kumpan und vil andere erbare lute.