LUB IX. CCLI Vor allen ghuden erbaren cristenlude, de dessen breff zeen horen edder lesen vnde besunderghen vor jwer groten loueliken beschedenheyden, ersamen borgemesteren vnde ratmannen der stad Lubec, vnde den bezworen erwerdighen olderlude vnde menen ghildebroderen vrunden, bekenne wy borgemester vnde ratmanne der stad odeslo nach loefflikem grute apenbare tughende in desme vzem breue, dat in vzer iegenwordichheit gekomen sint de erwerdighen louenvasten manne tughes, alse Hartwich Stemborch vnde Henneke Ryke, vze medebeseten borgher, de mit deren vtghestreckeden armen vnde mid vypgeholden vingheren stauedes eedes in den hilghen zworen strengheliken vnde nugafftighen vor vns warghemaket vnde tughet hebben, dat Goteke Spackmoller, wiser desses breues, is echte vnde rechte geboren an enem rechten vulkomen eebedde vnde van echten vryen vnberuchteden bedderuen Dudeschen lude, syme vader Goteke Spackmolre, syner muder Abelken zeliger dachtnisse, de in vnsme karspel vormalen to hope vnde tosamende gheuen sint nach cristliker wise, vortruwet nach deme vorlope der hilghen kerken, dede ok vnderlank geleuet hebben vnde gereghered alze vnberuchtede zeker bedderue lude bette an dat leste eres leuendes, ock van desme suluen Gotken Spackmolre ne anders ghehoret hebben, wen dat to der ere vnde reddelicheyt behoret, also dat he nugafftich vnde rethdanich is, ghilde, werke vnde ampte to besittende, wor he kumpt, wente he nicht Wendesch, schepers, pipers, lynnenweuers moellers sone edder eghen is, dat em van der bort weghen werke ampte ghilde mach hindern to besittende. Worumme, leuen heren vnde gantzen ghuden vrunde, bidde wy jwe ersamheyt leefliken mid gantzer anddach, gy willen vmme vzes vordenstes dem erbenomeden Gotken Spackmolre vorderen vnde darto behulpen wesen, dat he moghe werden en vulkomen medebroder jwes werkes vnde amptes, alze he mid jw dat patinemaker werk mote mede ouen vnde hebben jwe vrygheyde to brukende, dat wy alle weghe entgen jw vnde de jwen gerne willichliken wedder an liken offte groteren zaken vorschulden, wor wy konen vnde moghen. In tuchenisse desser vorscreuen dinghe hebbe wy vzer stad secret heenghet laten vor dessen breff. Screuen to Odeslo, in den jaren Cristi veerteynhundert an dem viffvndevefftighen, in sunte Appollinaris daghe des hilghen martelers.
Nach dem Original. Das anhangende Secret ist nur zur Hälfte erhalten.
Aus: Lübecker Urkundenbuch, CCLI., S. 262f.