Stabilimenta Rhodiorum militum - Synopsis

based on the older manuscript tradition as well as on the French and Latin versions

© Jyri Hasecker, Hamburg / Jürgen Sarnowsky, Hamburg (2007/2022)

2376-Collations 12

Enacted by the chapter general at Rhodes 23 April, 1433.

BNCF Ms. Magl. cl. XXXII, 37, fol. 64v.
De fratribus et receptoribus, qui capiunt statum preceptoriarum
Item quia sepe contingit, quod, dum aliquis frater dimittit suam preceptoriam accipiendo aliam pro melioratione, spoliat omnino vel in parte preceptoriam, quam dimittit, suo statu in magnum damnum, destructionem et desolationem ipsius et per consequens nostre religionis, per hoc presens capitulum stabilimus et ordinamus, quod omnis frater se meliorans de preceptoria teneatur dimittere integre statum ipsius relaps(at)e, prout reperierit, et qui aliud retinebit, non se valeat meliorare officio aut beneficio quocumque nec sibi computetur antiquitas aliqua in conventu, donec reddiderit integre quicquid de dicta preceptoria receperit, et si infra unum annum non reddiderit, ut dictum est, privetur ipsa preceptoria vel preceptoriis, quas tenebit, nec possit habere aliam usque ad quinquennium. Et similiter receptor, qui levabit spolia preceptoris defuncti, teneatur et debeat dimittere statum preceptorie vacantis, cuius levabit spolia, secundum stabilimenta nostrorum predecessorum. Et quia usque in hodiernum (dicte) in aliquibus locis et partibus non fuerunt posita executioni dicta stabilimenta, adiunctum est per hoc presens capitulum, quod receptor contrarium faciens non solum teneatur reddere id, quod receperit de dicto statu, sed etiam solvat annatem mortuarii suis expensis vel suum valorem, et applicetur utilitati et comodo nostri communis thesauri. Et si receptor nollet facere rationem de se ipso, quod prior teneatur administare super hoc rationem et iustitiam fratribus se conquerentibus. Qui, si recuset, teneatur solvere dictum statum vel illud, quod de dicto statu deerit, dicto fratri se conquerenti.

Next Collations 13 | Back to the Contents