Stabilimenta Rhodiorum militum - Synopsis

based on the older manuscript tradition as well as on the French and Latin versions

© Jyri Hasecker, Hamburg / Jürgen Sarnowsky, Hamburg (2007/2022)

2374-Collations 10

Enacted by the chapter general at Rhodes 19 September, 1420.

BNCF Ms. Magl. cl. XXXII, 37, fol. 52v-53r.
De permutationibus non fiendis
Item propterea quod in permutationibus domorum religionis, quando fuerit ultra mare, et suum sortitum effectum sine licentia magistri et conventus et sine cognitione linguarum hic existentium fuerit, possunt fieri fraudes gravissime in preiudicium fratrum conventus et damnum ipsorum domorum, stabilitum est, quod eo non obstante, quod prior aut alter quicumque superior tamquam ordinarius dictas permutationes accipia(n)t, permutationes ipse nullius sint valoris, neque suum sortiantur effectum (sed) neque fratres huiusmodi permutantes in preceptoriarum permutatarum possessionem possint poni, quousque per magistrum et conventum – antea informatos per priorem seu alium superiorem, qui huiusmodi permutationem recepit, de etate fratrum permutantium et de valore permutatarum preceptoriarum – permutationes huiusmodi fuerint confirmate. Super quibus etiam fiat mentio in lingua de illa, de qua huiusmodi preceptorie fuerint, priusquam ad confirmationem procedatur. Et si forsan prior aut alius superior contra huius stabilimenti tenorem mitteret aut mitti facerit dictos fratres permutantes in possessionem preceptoriarum taliter permutatarum, priusquam de confirmatione supradicta eidem apperet vel non informans magistrum et conventum de veritate facti, quod dictus prior aut alius superior perdat revenutam alterius camerarum suarum pro uno anno, que annuatim debeat levari et applicari thesauro, et permutatio huiusmodi ipso facto sit nulla. Et pariter hoc: si fratres huiusmodi permutantes intrarent possessionem harum preceptoriarum permutatarum, perdant eas, et provideatur de eisdem secundum tenorem stabilimentorum, nec usque ad quinquennium eum valeat provideri. Et similiter intelligatur de simplicibus resignationibus, que possint fieri in manibus prioris. Qui priores huiusmodi resignationes bene valeant recipere, sed de resignatis preceptoriis non possint disponere. Quinimmo significent huiusmodi resignationes magistro et conventui, ut super illis, pro ut eis visum fuerit, expedire [read: disponant].

Supplemented by the chapter general at Rhodes 23-24 May, 1428.

BNCF Ms. Magl. cl. XXXII, 37, fol. 59r.
De resignatione prioratuum seu camerarum per priorem facta.
Item cum ad obviandum magnis fraudibus, que possent committi in permutationibus et resignationibus, que assuete sunt fieri, in preiudicium fratrum commorantium in conventu in servitium dei et religionis sit bene provisum per nostrum predecessorem magistrum Philibertum de Nailliaco, et quia ibi non fit mentio de prioribus, qui similiter possent resignare eorum prioratus vel cameras priorales, est adiunctum dicto stabilimento, quod ex nunc in antea nullus prior possit nec debeat renuntiare suum prioratum nec camera seu cameras priorales nisi in manibus magistri et conventus. Et qui fecerit contrarium, talis renuntiatio reputetur nulla et nullius valoris, et renuntians et qui receperit renuntiationem habeantur pro inobedientes.

Next Collations 11 | Back to the Contents