Stabilimenta Rhodiorum militum - Synopsis
based on the older manuscript tradition as well as on the French and Latin versions
© Jyri Hasecker, Hamburg / Jürgen Sarnowsky, Hamburg (2007/2022)
2262-Priors 13
--> French version
--> Latin version
Enacted by the chapter general at Rhodes 19 September, 1420.
BNCF Ms. Magl. cl. XXXII, 37, fol. 54r.
Quod debeant fieri sigilla prioratuum
Item stabilimento magistri Elie de Villanova(a) – continenti quod plura damna, que in religione fuerant perpetrata propter malam et indebitam custodiam communum sigillorum prioratuum, que antea male fuerunt conservata et de quibus sine consilio proborum virorum fuerunt sigillate multe carte cautelose, periculose et damnose nostre religioni, propter quod fuerat preceptum, quod in virtute sancte obedientie ex tunc in futurum sigilla communia priorum nostre religionis ponantur et custodiantur sub sigillo prioris et quattuor proborum virorum cuiuslibet prioratus, et nulla littera seu carta de dicto sigillo nisi cum prioris et quattuor proborum virorum predictorum licentia sigilletur – rursus (et) stabilimento magistri Raymundi Berengarii(b) – continenti quod sigillum commune priorum sint in custodia quattuor preceptorum, et quod nulla littera ipso sigillo sigilletur nisi cum prioris et quattuor proborum virorum consilio, quemadmodum stabilitum fuerat, et tam agentes in contrarium quam consentientes perdant habitum – adiunctum est, quod quicumque prior, [qui] non habet sigillum commune, quemadmodum dictum est, faciat fieri et maneat ipsum sigillum in custodia dicti prioris in uno coffeo seu in una cassa sub sigillis quattuor preceptorum, et quod de eo utatur per modum supradictum et non aliter. Preterea teneatur quilibet prior huc mittere magistro et conventui impressuram seu carater sigilli prioratus in cera in una parva boesta seu pisside de ligno, ut semper in conventu ipsius notitia habeat[ur]. Que impressure sigillorum, postquam hic fuerint, conserventur in thesauro sub bulla magistri et septem baiulivorum. Et per istud generale capitulum novissime preceptum est in virtute sancte obedientie, quod stabilimenta una cum addimento seu adiunctione presenti observentur et custodiantur per omnes priores prioratus et castellanos et castellaniam Emposte iuxta eorum formam et tenorem sub poenis in eisdem contentis.
(b)Enacted by the chapter general at Avignon 1367 März 5, s. BNCF Ms. Magl. cl. XXXII, 37, fol. 40r-v.