Stabilimenta Rhodiorum militum - Synopsis
based on the older manuscript tradition as well as on the French and Latin versions
© Jyri Hasecker, Hamburg / Jürgen Sarnowsky, Hamburg (2007/2022)
2250-Priors 1
--> French version
--> Latin version
Enacted by the chapter general at Acre 19 September, 1262.
NLM Arch. 69, fol. 8v-9r
Statutum est, quod, cum priores moriuntur in partibus ultramarinis, baylivus seu preceptor, in cuius baiulia defecerit prior, convocare debet xii fratres baylivos baiuliarum eiusdem prioratus propinquiorarum sue baiulie ad constituendum locumtenentem prioris unum ex fratribus prioratus eiusdem, quem convenientiorem et sufficientiorem prospexerint ad onus huiusmodi tollerandum. Cui locumtenenti prioris constituto et ordinato per fratres duodecim supradictos ceteri fratres prioratus ipsius in cunctis obedire tenentur, quousque mors prioris defuncti ad audientiam magistri perveniat citra mare seu magni preceptoris, sive a magistro recipiant aliud in mandatis. Et si contingeret priorem mori in aliqua baiuliarum seu camerarum ad proprias eius manus retentarum, bailivus seu preceptor baiulie propinquioris camere seu baiulie, in qua prior decessit, appellet xii fratres, qui appellandi erunt ocasione et ratione pretactis. Qui omnes insimul congregati ordinent et constituant locumtenentem prioris modis superius designatis. Et si forsan prior nuncius destinatus in servicio alicuius principis aut de mandato magistri pro aliquibus domus negociis exequendis extra eius prioratum constitutus obiret, frater ille, quem dictus prior in eius prioratu suum locumtenentem relinquerat, quando ipse recessit de eodem pro dictis servicio seu negociis exequendis, faciat et ordinet modo et forma premissis.
Already edited [with mistakes] in Cart., 3, no. 3039, p. 50, §29.
Supplemented by the chapter general at Rhodes 12 September, 1344.
NLM Arch. 69, fol. 18v.
Item statutum est, quod statuto facto per magistrum Hugonem Revel anno incarnationis domini Mcclxii die xix mensis Septembris in capitulo generali celebrato apud herbergias prope Caesariam et Iafam et apud Aconem ad vineam novam, cuius tenor talis est: [as above], additum est, quod nullus prior seu locumtenens prioris ultra mare in locumtenentem prioris eligi possit. Quodque nec ipse nec fratres illi, qui erunt pro eo in preceptoria prioratus prioris defuncti, possint esse ad electionem locumtenentis prioris. Et quicquid factum est vel fiet contra hoc, per presens capitulum cassatur et annulatur. Est insuper districte preceptum sub virtute sancte obedientie, quod hoc firmiter observetur.