Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1250-Priores 1
De prioribus
Frater Hugo Revel magister
i. Quomodo eligi debent locatenentes priorum decedentium
Non decet fratrum consortium preside carere, ne rectore orbati ordinis agenda negligentius tractentur. Sancimus itaque, quod prioribus seu castellano Emposte in partibus(a) ultramarinis vita functis preceptor, in cuius preceptoria mortem obierit(b), duodecim preceptores – si tantorum copia fuerit, si minus, quanto plures poterit – ipsius prioratus vel castellanie, quorum preceptorie propinquiores extiterint, accire et vocare debeat, qui una congregati maturo consilio prehabito, qui vicem et locum prioris vel castellani Emposte teneat, aliquem ex fratribus dicti prioratus probum idoneum et huic administrationi et oneri magis aptum eligant et deputent. Cui quidem sic electo omnes et singuli dicti prioratus fratres parere et obedire teneantur, quousque obitus prioris ad noticiam magistri citra mare pervenerit, et aliter a magistro et conventu, si eis fuerit iniunctum. Si vero prior in aliqua preceptoriarum seu camerarum prioralium ad suas manus detentarum decesserit, preceptor preceptorię, que tali camere propinquior erit, pari modo et forma duodecim preceptores vocabit, qui prioris vicegerentem eligant. Si autem prior extra limites prioratus causa alicuius legationis seu alia occasione decesserit, tunc qui vices prioris vel castellani in suo a prioratu discessu dimissus fuerit electionem locumtenentis modo prius declarato exequatur et fieri procuret atque preceptores convocet, qui prioris vicegerentem eligant.
(b) Ulm 1496 obedierit.