Stabilimenta Rhodiorum militum - Latin version

1413-Stabilimenta1493-Thesaurus 3

   Frater Petrus Daubusson cardinalis et magister
iii.^(a) De iuribus mortuariorum et vacantium beneficiorum ordinis communi thesauro exolvendis

Consuetudo certe laudabilis, inveterata, firma et inviolata nostro in ordine inolevit, quod per obitum priorum, castellani Emposte, preceptorum et provisorum prioratus, castellania Emposte, preceptorie et beneficia iura mortuarii et vacantis – videlicet a die obitus usque ad festum sancti Ioannis Baptiste de mense Iunii inde proxime sequuturum fructus et redditus dicti anni pro mortuariis et a dicto festo sancti Ioannis Baptiste usque ad aliud festum eiusdem proxime sequendum fructus et redditus ipsius anni pro iure vacantis – solvere tenentur preter et ultra ius spoliorum, que ad thesaurum perveniunt. Itaque, ne aliquo pacto huiusmodi rita consuetudo vertatur in dubium, eidem consuetudini firmiter inherentes sancimus, stabilimus et instituimus, quod prioratus, castellania^(b) Emposte, preceptorie et qui provisi de eisdem per obitum fuerint ad huiusmodi iura mortuariorum et vacantium exolvenda teneantur. Quod si aliqui renuerint aut contradixerint, in poenam privationis habitus et beneficiorum eo ipso incurrere censeantur. Non enim est equum et licitum^(c) thesaurum ordinis nostri iuribus eius defraudari.