Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1393-Collationes 29
Frater Petrus Daubusson cardinalis et magister
xxix. De modo certificationis meliorationis preceptoriarum faciende per eos, qui melioramentum habere pretendunt
Ad evitandum damnum, fraudes et dolos, qui contingere possunt occasione faciende visitationis de melioratione preceptoriarum facta per preceptores, qui pretendunt se meliorare, stabilimus, quod visitatores deputati per priorem et castellanum Emposte aut eorum locatenentes atque capitulum provinciale cum iuramento, quo adacti fuerint, debeant omni diligentia et discretione visitare preceptorias tam in capite quam in membris et oculata(a) fide videre, quod fuerit melioratum et quod deterioratum et damnificatum culpa preceptorum, qui se pretendunt meliorare, eo tempore, quo possiderint preceptorias. Que quidem meliorationes et damna debeant particulariter specificari in litteris certificationis priorum et castellani Emposte vel eorum locatenentium in capitulo provinciali ordinatis, que fecerint de dicta melioratione, ut comodo et incomodo equa lance ponderato dignoscatur, an melioratio emineat deteriorationi vel econtra.
Next Collationes 30 | Back to the Contents