Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1376-Collationes 12
[112r] Frater Antonius Fluviani magister
xii. Quod fratres in assumptione melioramentorum sint obligati dimittere statum preceptorie, quam resignant
Preceptoriarum damna precavere studentes, et ne earundem futuri preceptores statu debito frustrentur, quinimmo ipsum illesum ac integrum recipiant, ideo volumus et mandamus, quod preceptores ad alias preceptorias per melioramentum se transferentes preceptoriarum, quas dimittunt, statum integrum in eis, sicut reperierint, dimittant. Quod si contrarium fecerint et ablata non restituerint intra annum, tunc eo ipso privati sint preceptoriis et alias habere termino quinquenii non possint. Adiicientes etiam, quod, si receptores de statu preceptoriarum aliquid abstulerint, illud restituere teneantur. Et preter hoc poenam valoris mortuarii eiusdem preceptorie subeant, qui valor thesauro applicetur. Super quo prior et castellanus Emposte ministrare iusticiam fratri conquerenti tenetur. Quod si facere recusaverit, tunc et in eo casu prior propter iusticie denegationem ipsum statum propriis expensis exolvere atque complere teneatur.
Next Collationes 13 | Back to the Contents