Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1334-Fratres 61
Frater Petrus Daubusson cardinalis et magister
lxi. De moderatione fratrum in congregationibus linguarum
Quoniam plerunque contingit contra omnem honestatem, modestiam et reverentiam vere illibateque obedientie, quod fratres in congregationibus linguarum utuntur gestis et actis indecentibus nulla reverentia in baiulivos et superiores servata, quinimmo consultationes et deliberationes in dedecus ordinis et preiudicium publici co-[101r]modi perturbant, eapropter stabilimus, quod baiulivi, priores, preceptores et fratres, cuiuscunque conditionis fuerint, in congregationibus et celebrationibus linguarum in conventu Rhodi debeant uti modestia et temperantia in sedendo secundum eorum ordinem et gradum, audientes et intelligentes baiulivos vel eorum locatenentes in his, que proponunt, etiam procuratores tam dicte lingue fratres quam alterius aut partes in disceptatione causarum, ita quod non dent molestiam vel aliquam turbationem seu innovationem. Et ita cum maturitate et quiete intellectis propositis ac differentiis debeant pro eorum ordine et gradu dare suffragium et loqui. Lingua quoque compleat suam deliberationem. Cui si aliquis contradixerit, aut propterea se senserit gravatum a deliberatione, ad magistrum et consilium ordinarium habeat recursum. Coram quibus sua iura allegabit. Iusticia quoque partibus auditis ministrabitur. Qui contrafecerit, in poenam quarantene labatur.
Next Fratres 62 | Back to the Contents