Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1318-Fratres 45
Frater Antonius Fluviani magister
xlv. Quod fratres non occupant aut violenter detineant membra aut preceptorias religionis
Insolentiam perversorum opprimere cupientes statuimus, quod, si fratres ordinis nostri tenere quovismodo aut occupare presumant(a) preceptorias, membra aut domos vi atque contra voluntatem magistri aut prioris seu castellani Emposte vel fratris, cui illa pertinerent et per collationem religionis spectarent, perdant habitum et carceri mancipentur. Qui, si de habitu gratia facta fuerit, bailiam aut aliud regimen per decem annos consequi non possint. Adicientes, quod prior et castellanus Emposte ad instantiam fratris, cui beneficia occupata spectant, teneatur et debeat totis viribus occupatorem expellere et beneficia in suam potestatem redigere ac possessionem pacificam proviso legittime dare. Quod si facere nequiverint, ad hoc agendum brachium seculare invocare possit uterque tam prior quam frater, cui beneficia spectabunt. Id quoque prior exequi tenetur sub poena privationis unius camere, quam amittat, si autentice constabit ea exequi neglexisse. Nihilominus quia in prioratu Anglie preceptorie ordinis nostri pauca vel nulla fortilicia habent, quare violentia dari non potest, ideo prior dicti prioratus tenetur ad omnem requisitionem fratris provisi per magistrum et conventum aut religionem dare possessionem pacificam beneficii(b), de quo fuerit provisus. Et si talis frater ostenderit autentice requisivisse occupatorem de habenda possessione et pariformiter priorem, qui non obstante instantia negligens fuerit in executione(c) predictorum, eo in casu una suarum camerarum prioralium privatus censeatur. Quarum quidem litterarum sic vacantium provisio(d) fiat per magistrum et conventum fratri, cuius beneficia occupantur.
(b) Venice 1495, Ulm 1496, Salamanca 1534; Ms. beneficiis.
(c) Venice 1495, Ulm 1496, Salamanca 1534; Ms. exequotine.
(d) Venice 1495, Ulm 1496, Salamanca 1534; Ms. priviso.
Next Fratres 46 | Back to the Contents