Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1301-Fratres 28
[93r] Frater Ioannes Ferdinandus de Heredia magister
xxviii. Quod fratres non incedant cum gentibus armorum nec eorum bellis se immisceant
Indecorum et prorsus a ratione alienum videtur, quod fratres ordinis nostri fidei tuitioni dedicati Christianorum bellis implicentur. Quinimmo arma in fidei tuitionem aut religionis nostre conservationem exercere debent. Quapropter stabilimus, quod fratres ordinis nostri non implicent se bellis et gentibus armorum Christianorum ad invicem. Quod si quis commiserit(a), habitum perdat, quem si de gratia speciali recuperaverit, preceptoriarum et beneficiorum administratione decem annos privetur, quam habere non possit nisi decennio elapso. Inhibentes priori et castellano Emposte ac preceptoribus, ne dent licentiam fratribus se exercendi in bellis Christianorum, nisi eis iniunctum esset a principe vel domino provincie, quod tunc licentiam concedere possint. Attamen eo in casu arma seu insignia religionis deferre non possint, sed si pro defensione(b) religionis nostre vel in comitiva prioris talibus bellis se immiscuerint, tunc insigniis ordinis nostri uti possint.
(b) Venice 1495, Ulm 1496, Salamanca 1534, Ms. defenssione.
Next Fratres 29 | Back to the Contents