Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1258-Priores 9
Frater Philibertus de Nilliacho(a) magister
viiii. Quod priores in suis prioratibus et preceptores in suis preceptoriis habent iurisdictionem correctionis super fratres capellanos
Impunitas plerunque mali occasionem affert et nonnulli ob correctoris absentiam proniores ad delicta committenda redduntur. Cum itaque prior ecclesie sancti Ioannis collaci Rhodi, qui in capellanos delinquentes iurisdictionem exercet, in conventu Rhodi assiduam gerit residentiam, propter quod eius absentia obsistente super delictis capellanorum extra conventum Rhodi in prioratibus et preceptoriis degentium commode providere et ipsos corrigere, quotiens necessarium existit, non potest, ideo, ne occasio delinquendi prebeatur, stabilitum est, quod priores et castellanus Emposte in prioratibus suis et preceptores in preceptoriis(b), quas possident, super fratres capellanos in ipsis residentes iurisdictionem pro delictorum qualitate et correctionem exerceant, totiens quotiens delinquerint(c), quemadmodum prior ecclesie in conventu Rhodi facere consuevit. Ubi autem ipsi capellani extra conventum Rhodi degentes per priores et preceptores suos superiores super eorum delictis amoniti fuerint, et nihilominus in delictis perseveraverint, possint per priores corrigi et puniri, prout fratres milites et servientes religionis delinquentes secundum formam stabilimentorum puniuntur. Si tamen prior ecclesie in partibus occiduis ac prioratibus et preceptoriis presens aliquando fuerit, ubicumque personaliter affuerit, iurisdictionem in fratres capellanos exerceat eosque corrigat. Visitet quoque et re-[85r]formet ecclesias. Divinumque officium fieri decenter ordinet ac defectus corrigat non obstantibus supradictis, que nullo pacto prioris ecclesie iurisdictioni, cum presens fuerit, preiudicium generent(d).
(b) Venice 1495, Ulm 1496, Salamanca 1534; in Ms. follows suis.
(c) Venice 1495, Ulm 1496, Salamanca 1534; Ms. deliquerint
(d) Ms., Venice 1495, Ulm 1496, Salamanca 1534: generet.
Next Priores 10 | Back to the Contents