Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1236-Baiulivi 34
Frater Petrus Raymundus Zacosta magister
xxxiiii. De prerogativis magni preceptoris et admirati super officio tercinalis et volte et administratione rerum eiusdem
Ad pacificandum differentiam, que est inter venerabiles magnum preceptorem et ceteros fratres lingue Provincie ex una et admiratum ac alios fratres lingue Italie partibus ex alia super officio tercinalis et volte, auditis et intellectis dictis partibus et earum rationibus dictam differentiam determinamus et per sententiam diffinitivam stabilimus et ordinamus auctoritate huius presentis capituli, quod de cetero magnus preceptor debet et possit ponere et eligere preceptorem dicte volte et tercinalis habens talem preeminentiam ipse magnus preceptor, sicuti consuevit.
Qui preceptor volte teneatur reddere bonum computum quolibet mense omnium rerum per eum administratarum ante auditores computorum, qui per magistrum et consilium ordinarium erunt ordinati, et de qualibet re suum computum particulariter, ut statim de qualibet re, quid restabit, et quid deficiet, sciatur.
Et quod admiratus non preiudicando dicto officio prefati preceptoris volte et tercinalis ultra dictum preceptorem possit et debeat ponere unum officialem nominatum probum virum sibi benevisum, qui possit edificare intra limites dicti tercinalis ad intrandum dictum tercinale et exeundum domum. Qui probus vir teneatur habere unum librum, in quo scribat omnes res, que essent empte et conducte, sicuti: ferrum, ligna, remi, filum, stuppa, pix, arma, vela et omnia alia, de quibus debeat onerare dictum preceptorem, et omnes expense, que erunt facte quolibet die, sint vise et verificate per dictum probum virum, alias non admittantur in computis. Et quod non absit de volta quolibet die, quando operabitur pro thesauro.
Et quod omnium rerum sit factum [79r] unum inventarium, copiam cuius teneat magnus preceptor, unam admiratus et unam dictus probus vir, qui pro tempore erit, augendo et diminuendo quando res augebitur et diminuetur. Et omnia reponantur in bono loco et competenti ad eorum conservationem. Et quod dictus probus vir et etiam ipse preceptor quilibet teneat unam clavem magaseni.
Insuper eliget dictus admiratus unum scribam et deputabit eum dicto officio tercinalis et volte, qui teneat registrum ad preceptum admirati omnium rerum, que sunt intra dictum tercinale et voltam pertinentium marinarie, que res non debeant removeri a locis solitis. Et totiens quotiens voluerit idem admiratus scire a scriba, que res sint in dictis locis, vel si sint bene custodite et in bono ordine, possit facere ad suum placitum et similiter idem magnus preceptor. Et quod dictus probus vir et scriba subiaceant iurisdictioni ipsius admirati, qui eos deponere a dicto officio et eodem constituere possit officio.
Et quod omnes cedule expensarum sint sigillate signeto dicti magni preceptoris, sicut solitum est. Et quod dictus preceptor tercinalis et volte habeat gagia florenorum viginti et similiter probus vir. Scriba autem habeat gagia solita. Intelligendo, quod nullo modo possint supradicti extrahere a dicta volta tercinalis aliquid, ut puta remos, stuppas, vela et cetera supradicta, sine licentia magistri, et nisi fuerit pro armamentis galearum et fustarum religionis. Et quod dicti preceptor volte et probus vir mutentur de biennio in biennium sicuti ceteri officiales.
Next Baiulivi 35 | Back to the Contents