Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1142-Capitulum 6
Frater Petrus Raymundus Zacosta magister
vi. De procuratoribus in capitulo generali admittendis
Stabilimus, quod procuratores baiulivorum, priorum et castellani Emposte ac preceptorum per capitulum et prioratuum, cuiusvis conditionis sint, non admittantur per magistrum et generale capitulum nec in capitulo intersint, nisi sufficiens et autenticum procuratorium suorum principalium demonstraverint cum speciali potestate ad comparendum in capitulo et concludendis ac tractandis in eodem consentiendum. Adiicientes, quod baiulivi, priores, castellanus Emposte, preceptores per capitulum(a), prioratus et(b) castellanie Emposte, qui personaliter aut per procuratorem legitimum in capitulo generali non intervenerint, teneantur habere et tenere rata et firma quecumque in capitulo generali tractata et conclusa fuerint, ac si presentes(c) aut per procuratores interfuissent in eodem.
(b) Missing.
(c) Venice 1495, Ulm 1496, Salamanca 1534; Ms. per presentes.
Next Capitulum 7 | Back to the Contents