Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1129-Thesaurus 33
Frater Petrus Daubusson cardinalis et magister
xxxiii. De exequtione facienda contra illos, qui non solvunt iura thesauri
Parum esset iura imponere, leges quoque instituere et condere, nisi huiusmodi iura exolverentur(a) ac instituta exequtioni demandarentur et contumacibus transgressibus poena debita infligeretur. Itaque sancimus et stabilimus, quod si priores, castellanus Empostę, baiulivi, preceptores et fratres solvere iura thesauri renuerint, contempserint aut distulerint quolibet anno in capitulo provinciali vel in festo sancti Ioannis Baptiste, si capitulum forsan non celebrabitur, quod eo ipso et incontinenti tales debitores dictis capitulis provincialibus vel in festo sancti Ioannis Baptiste de mense Iunii elapsos absque aliqua declaratione ac privationis promulgatione intelligantur et sint privati prioratibus(b), castellania Emposte, bailiis, preceptoriis, membris, domibus, dignitatibus et officiis absque alia vocatione et citatione, quia terminus in capitulo provinciali per generale capitulum assignatus intercedit pro thesauro, de quo nullus ignorantiam potest pretendere, visa promulgatione in capitulo generali facta. In quo hi, quorum interest, aut eorum legitimi procuratores adesse dignoscuntur, qui, si etiam contumaces fuerint, per stabilimenta ordinationi capitulari stare obligantur, auctoritate quoque apostolica huiusmodi impositiones et institutiones corroborate censentur. Nam si dilatio iudiciorum aut provocatio concederetur pendente termino ordinis status in ruinam, quod deus avertat, prolaberetur, nec votorum emissorum ignari immemoresque esse debent, quibus astricti ordini subvenire et rerum proprietatem explodere, reiicere, contemnere tenentur.
(b) Salamanca 1534; Ms., Venice 1495, Ulm 1496: prioribus.
Next Thesaurus 34 | Back to the Contents