Stabilimenta Rhodiorum militum - Latin version

1035-Ecclesia 2

   Consuetudo
ii. Quod fratres sunt obligati orationem dominicam centies quinquagesies quotidie dicere.

Religionis nostre institutores prudentissima ratione suasi iniunxerunt, ut fratres nostri milites et servientes, qui orationi vacare tenentur, qua in deum mens elevatur, conpediosum modum orandi haberent, ut facile orationi, hospitalitati et fidei tuitioni operam adhibere possent. Itaque maiores nostri hanc orandi consuetudinem instituerunt, videlicet, quod omnes fratres ordinem nostrum professi milites et servientes singulis diebus simul aut diversis horis orationem dominicam a domino nostro Iesu Christo in lege evangelica institutam, quę vulgo paternoster vocatur, centies quinquagesies devote dicant. Qui numerus orationis dominicę datus censetur in compensationem et satisfactionem^(a) horarum ecclesiasticarum. Scilicet pro matutinis diurnis xiii, pro matutinis horarum nostre domine xiii, pro prima hora xiii, pro tertia xiiii, pro meridie xiiii, pro nona xiiii, pro vesperis xviii, pro completorio xiiii, pro psalmis xv matutinorum xv, pro vigiliis mortuorum xiiii, pro vesperis mortuorum viii. Hinc etiam laudabili consuetudine apostolicoque privilegio inolevit, quod si alicui placuerit et otium dabitur de beata virgine vel de mortuis horas et officium dicere, quod horum alterum dicendo ad eum numerum orationis dominice non est [34r] obligatus. Fratres vero sacerdotes, diaconi, subdiaconi et clerici ordinis nostri secundum sacratissimi sepulchri Hierosolimitani consuetudinem officium canonicum pro gradu sui ordinis suscepti celebrare tenentur. Eam quoque institutionem a maioribus traditam inviolabiliter servari iubemus.