Stabilimenta Rhodiorum militum - Latin version
based on the manuscript in the National Library of Malta, Archives of the Order of St. John, no. 244
© Jyri Hasecker, Hamburg / Jürgen Sarnowsky, Hamburg (2007/2022)
1007-Regula 3
[24r] Consuetudo
iii. Exercitium militie pro Christo.
Ordo quidem noster ab eius primeva institutione sacrosancte sedis apostolice, catholicorum regum, principum et devotorum Christicolarum munificentia, suffragio, favore, prediis, possessionibus, dicionibus, gratiis, privilegiis, immunitatibus dotatus, auctus, ampliatus, ditatus est, ut vera caritate – virtutum matre (a) firmaque basi – incensi milites ordinem professi sancte quidem hospitalitati fidei militiam adiungerent, cumularent, copularent, duplicique fungentes exercitio gestis virtuosis sese dicarent. Peculiare certe et proprium est Christi militi non postpositis sacre hospitalitatis sanctis operibus pro Christi nomine, pro cultu divino, pro fide catholica pugnare, iustitiam colere, revereri, tueri, opressos fovere, sublevare, defendere. Ad [23v] hoc enim hospitalarii milites Christi hospitalitatem et militiam exercentes exteriori veste signum crucis octogonum devota consideratione virtutibus insignitum gestant, ut interiori etiam veste vivificę crucis signum spiritualiter deferant, dexteraque manu acutum vibrantes gladium post multifariam elemosinarum elargitionem gentem Mahumeteam et qui a fide deviant oppugnent, premant, pessundent. Quibus quidem sanctis operibus addicti sanctorum certe martyrum militum Machabeorum pro cultu divino pugnantium exemplum saluberrimum sequi imitarique monentur, invitantur, accenduntur. Qui pauci innumeros exercitus prophanarum gentium divino aducti presidio quandoque premere, vincere, subiicere soliti sunt. Meminerint perpetuaque mente teneant religiosi milites nostri cultus divini zelo informati sacratissime regule vota substantialia – obedientiam, castitatem, paupertatem – tenere, complere, perficere, virtutibusque moralibus et thelogicis intendere studeant. Quibus prudenter, temperanter, fortiter, caritate inflamati pro Christi salvatoris nostri sacro nomine, pro vivifice crucis signo, pro iustitia, pro pupillis, pro viduis gladio exerto, quod certe pericula aggredi non formident. Nemo quippe maiorem caritatem habet, quam ut animam, idest vitam, ponat pro amicis, idest catholicis.(b) Id eorum proprium est, ea est vocatio, ea est electio, ea est iustificatio, ea denique est sanctificatio, ut hac peregrina vita peracta spe firma erecti eterno fruantur premio, ad quod humanum genus a deo(c) creatum est. Qui vero sanctorum operum et belli, quod pro Christiano nomine geretur, prevaricator, detractor, desertor convinctus fuerit, ad perversorum terrorem et bonorum laudem animadversio et severa poena pro stabilimentis et consuetudinibus ordinis proposita haud immerito censetur.
font style="font-family: arial" font size="-1">
(b) Joh. 15,13.
(c) Ulm 1496, Salamanca 1534; Ms. adeo.