Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
411-Statuts1493-Tresor 1
[p7r]
Frere Pierre d’Aubusson cardinal et maistre
i.(a) Du payement des droiz du tresor, non obstant quelconque destruction
Nulle chose tant est à cueur aux capitulans que par toute pensée et estude les choses instituir, lesquelles consultent au prouffit et honneur de la religion, comme le payement des droitz du tresor et la satisfaction aux termes prefix, sans quoy nostre ordre – que Dieu ne permecte ! – iroit en ruyne. Pour lesquelles causes par plusieurs institutions ou temps passé a esté procedé contre les mal paysans à privation d’habit et de benefices, incontinent que auront esté contumaces passé le terme, sans autre dilation. Neantmoins aulcuns se sont trouvez que, non [p7v] ayans à memoire la profession et obeissance et n’ayans paour des peines contenues es estatus sur le fait du payement des droitz du tresor, presument empescher et frustrer, en grant charge de leur conscience et honneur, dont sourt et advient grant dommaige ou tresor. Et pourtant que les choses qui de nouveau surviennent ont necessité de nouveau remede, par auctorité capitulaire establissons que tous et chascun baillifz, tant couventuaulx que par chappitre, prieurs, chastellain d’Emposte et commandeurs, tant exemps que non exemps, et membres et benefices de nostre ordre iceulx droitz à la feste de la Nativité de saint Jehan Baptiste du moys du juing, chascun an, doyent payer et aux recepveurs et procureurs du commun tresor satisfaire selon la rate et portion que sera ordonnée, selon la qualité du temps, par les chappitres generaulx et es bulles capitulaires declairé. Statuissons, consideré(b) que nostre religion est fondée et instituée à l’excercice des sainctes euvres de hospitalité et défense de la foy catholique, et que les biens et benefices sont donnez à ceste intention et fin exequir, et aussi tient et à real droit et vraye seigneurie et proprieté d’iceulx biens et benefices, prieurés, chastellanie d’Emposte, bailliages et commanderies qui sont conferies et données en commande, reservée la portion des droiz du trésor, et se aulcuns desditz prieurez, chastellanie d’Emposte, commanderies et benefices, ou par guerres, invasions ou exactions de princes ou par quelque autre occasion viennent à ruyne, vastation et destruction encores totale – que Dieu ne permecte ! – neantmoins la portion des droitz du tresor, imposée et qui pour le temps se imposera, liquidement, clerement et absoluement comme franche de jactures et dommaiges et de exactions de princes, cessant toute contradiction et dilation, parviengnent ou tresor. Et que tout les dommaiges et jactures aussi exaction soyent et s’entendent estre sur les prieurs, chastellain et commandeurs, encores que fust le dommaige tant grant que ce que resteront des fruictz des benefices ne fust suffisant à payer la portion et part desditz droitz, car les prieurs, chastellain d’Emposte, [p8r] commandeurs et possesseurs doyvent estre advisez que quant les fruictz et rentes en leur administration suffissent, pour le temps des dommages occurent supplissent à leurs despens affin que le tresor ne soit frustré de sa portion reservée pour conservation de l’estat de l’ordre, sans lequel ne pevent estre(c) les freres d’icelluy, en especial que à cause de non payer et pour contumace dommage et interest en eulx mesmes redonde et est converty. Et se aulucns seront contumaces, rebelles, renitens et contredisans, sans aulcune dilation, le terme passé, doyent incourir les peines de privation d’habit et des priorez, chastellanie d’Emposte, commanderies et benefices. Et neantmoins soyent entendus encourre incontinent es peines des privileges apostoliques octroyez à nostre ordre affin que par aulcune maniere le tresor ne soit frustré de ses droitz.
(b) Considerer.
(c) It follows Toutesfoiz ne puissent obtenir par aulcune maniere commanderies vaccantes par privacion de ceulx qui selon les.
Next Statuts1493-Tresor 2 | Back to the Contents