Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
246-Baillifz 44
[l1r]
Frere Pierre d’Aubusson cardinal et maistre
xliiii. De la residence et absence des baillifz couventuaulx ou couvent de Rhodes
Les baillifz couventuaulx comme conseilliers doivent adherir au maistre, par le conseil desquelz les affaires soient dirigiz. Pourquoy(a) n’est condecent que soient absens du convent. Neantmoins(b) desirans pourveoir aux occurrentes des choses nous establissons que cest ordre soit observé et gardé sur le fait de la residence et absence du couvent de Rhodes. Et pourtant ordonnons que les huit baillifz couventuaulx en aulcune maniere [l1v] ne puissent partir dudit couvent, mais que trois d’iceulx tant seulement selon leur ordre et degré puissent partir d’icelluy couvent et aller es parties de povent pour pourveoir sur les choses et affaires à luy occurens. Lesquelz baillifz couventuaulx qui ainsi partiront du couvent soyent tenuz personnellement de retourner et estre presens en icelluy en terme de quatre ans du jour que seront partiz de Rhodes. Lequel terme passé ne seront presens en Rhodes, incontinent est entendu que sans aucune admonestacion ou citacion soyent privez de leurs bailliages desquelz par maistre et conseil ordinaire soit pourveu. Et les freres qui en leur absence de Rhodes seront esleuz en baillifz couventuaulx soient tenuz de venir personnellement et estre oudit couvent ou terme de deux ans comptant du jour de leur election, aultrement ledit terme de deux ans passez, pareillement par maistre et conseil sans aultre citacion soit pourveu, saulve tousjours les sinotacions – c’est assavoir nominacions – de langues selon l’ancienne coustume. Toutesfois le maistre et conseil ordinaire puist pour les affaires de la religion sans tenir ledit ordre mander hors du couvent aulcuns des baillifz couventuaulx auquel n’est prefix aulcun terme de retourner, mais ce est laissé à la deliberacion de ceulx qui le manderont.
(b) neautmoins.
Next Baillifz 45 | Back to the Contents