Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
184-Esgard 16
[i5r]
Frere Baptise des Ursins maistre
xvi. Que le chief et freres de esgard soyent assignez sans dilation ; et de la suspition qu’on a du(a) frere de l’esgard
À lever toute suspition et dilation de justice nous establis-[i5v]sons que toutes et quantesfois l’esgard des freres sera donné, par consentement des parties ou par maistre et conseil comply, que en espace de deux jours, commençant de la concession dudict esgard, le maistre doibt assigner le chief des esgards, autrement par urgente negligence le conseil ordinaire sans dilation doibt ordonner le chief. Et les baillifs et pilliers des langues semblablement doyent deputer en terme d’un jour freres ydoines de leurs langues pour les esgards. Et se refuseront ce faire que le conseil y pourvoye. En oultre que chascune des parties puist refuser et donner pour suspectz deux freres tant seulement des freres qui se devront assigner et deputer pour chief et assistans de l’esgard, sans dire ne rendre cause de suspition. Et s’il plus vouldra tenir pour suspectz il est obligié de monstrer legittimes causes de suspition au maistre et conseil ordinaire qui sur ce doyent deliberer. Et les chiefz et freres des esgards soyent tenus de oyr les parties et leurs raisons avec silence et attention, sans interruption de voix ou de parolle, affin que faveur ne soit veue estre donnée à aulcun, mais egalité soit gardée envers tous. Et se aulcun contrefera, la partie qui se sentira lesé pourra alleguer pour suspect le contrefaisant, soit chief ou frere, qui n’ont rendue aultre cause de suspition doye partir de l’esgard.