Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
170-Esgard 2
[i2v]
Usaige
ii. Pour quelle cause naisse l’esgard
Aulcuns esgards naissent de plainctes faictes par maistre ou son lieutenant ou maréschal ou autre souverain. Et esgards qui naissent de plaincte doyent entrevenir tant seulement les huit baillifz couventuaulx ou leurs lieutenant ou huit frères. Et le chief est assigné par le maistre, qui est prieur ou bailly, ou par maréschal – quant se fait de ses plainctes sera donné aulcun frère – et iceluy chief à tant seulement ung vot. Et de tel esgard on n’a point de recours à effort ne aultres, mais le premier donne sentence diffinitive. Ou quel esgard le bailly de la langue de la quelle est celuy dont se fait la plaincte peut et doit entrevenir. Et ce que(a) par plusgrant part sera diffiny soit exécuté. En l’esgard lequel est tenu par plaincte du maréschal ou aultre souverain oultre le maistre ou son lieutenant sont huit frères de huit langues ou aultres pour(b) eulx quant dicelle ne se trouveroient. Et de tel esgard non se a recours à effort d’esgard, mais le premier donne sentence diffini-[i3r]tive. Aultres sont esgards qui procèdent de demande ou difference qui entrevient entre aulcuns. Desquelz esgards, soit la cause civile ou criminelle, se a recours à l’effort d’esgard et effort d’effort et esgard des baillifz. Aultres sont esgards naissans, c’est assavoir interlocutoires, qui sont prohibez et ne sont point admis affin que la justice ne soit troublée. Car quant le frère demande esgard soubre aucune chose incidente en la célébracion d’esgard il ne se doit point donner aultre esgard sur icelle jusques à tant que le premier soit finy. Et aussi de la chose concluse par esgard ou dépendant dicelle ne se doit donner aulcunement esgard.
(b) par.