Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
137-Chappitre 1
[h1r]
Du chappitre
Usaige
i. Comment le chappitre général(a) se tient et celebre
NOz prédecesseurs et anciens voulans pourveoir par prudente consideration à l’estat de la chose publicque selon l’ancienne coustume ont acoustumé de convocquer et tenir chappitre général où quel les meurs des religieux soient reformez, l’administration dirigée et les affaires occurens ordonnez. Nous adoncques en ensuyvant leurs vestiges suy-[h1v]mes acoustumé de célébrer et tenir chappitre général selon la coustume cy après escripte :
Il est chose décente et convenable au commencement, de l’entrée dudit cappitre, prier(b) et invoquer humblement le Saint-Esperit – sans lequel nul exorde et principe peult prendre bon fondement – affin que donne faveur aux choses commencées et que enlumine et adroisse les pensées et voluntez. Et pourtant quant les capitulans sont assemblez, et avant que procèdent aux actes capitulaires, vont en compaignée du maistre à l’esglise où au point du jour se chante messe solennelle du Saint-Esperit lequel tous devotement invoquent que(c) infonde et donne la grâce d’entendement par laquelle illuminez droictement puissent conseiller et determiner des affaires. Dicte la messe le maistre avecques la compaignée des capitulans et des frères se partent de l’esglise en manière de procession solennelle, sonnant la campane, le prieur de l’esglise, chappellains, diacres er clercs chantant l’ymne du Saint-Esperit. Et quant sont venuz ou lieu du chappitre se chante le verset Salvos fac servos etc. et soit dicte l’oroison du Saint-Esperit. Et après le chappellain chante l’évangille. Et le maistre, baillifz, prieurs, chastellain d’Emposte et frères capitulans s’assieent selon leur degré, dignité et prééminence et se list la reigle. Et puis ce(d) fait sermon par aulcun clerc ydoine selon l’exigence des choses et de ce que touche l’utilité publicques et le salut des âmes.
Et ce fait les chappellains et ceulx que ne sont incorporez au chappitre se partent. Après ce le maistre, se luy plaira, dira(e) aulcunes choses de la direction, de l’estat de la religion et des affaires publicques. Et puis les baillifz, prieurs, chastellain d’Emposte et frères capitulans présentent(f) au maistre, baisent sa main, révéramment, selon leur ordre et prééminence, la bourse avec le seel et roulle de l’estat de leurs offices, l’administration et des choses publicques l’oppinion contenant. Et le maréchal oultre ce présente la banniere de nostre religion. Présentées les bourses, bannyère et roulles ceulx qui sont incorporez au chappitre, premièrement recongneues et visiteez leurs procureurs legittimes et auctenticques, nom-[h2r]méement sont escriptes. En oultre lesditz roulles sont leuz par le vicechancelier à haulte et intelligible voix selon l’ordre, degré et prééminences. Iceulx roulles leuz est procédé à l’election des xvi. capitulans en la manière qui s’ensuyt : Les frères incorporez oudit chappitre, separez par langues, par licence et commandement du maistre s’assemblent pour chascune langue ou lieu dudit chappitre. Et chascune desdites langues eslist des incorporeaulx oudit chappitre et dicelle langue mesmes deux frères ydoynes et discretz, et puis les présente au maistre. Faicte ladicte election iceulx xvi, constituez devant le maistre, révéramment font jurément que sans affection ou passion particulière ou desordonnances consuleront, determineront et statueront l’onneur et utilité de la religion et des frères. Et le maistre et aultres capitulans qui demeurent ou lieu du chappitre pour traicter les aultres affaires jurent ou permettent tenir et avoir aggréable ce que par iceulx xvi sera conclud, délibéré et institué.
Et ainsi iceulx xvi, obligiez par solennel jurément, vont à lieu séparé – et avec eulx va le procureur du maistre qui a voix consultive, non decisne, et le vichancelier pour redigir en escript les délibérations – où traictent, concluent et délibéront les affaires en celle ordre : Premièrement de la imposition de la porcion pour subvenir à la religion ; et après du régime et gouvernement du trésor ; en oultres visitez les roulles discutent, délibérent, concludent et diffinissent de reformacion des coustumes, de institution des establissemens et d’autres ordinations et affaires emergens. Et les aultres capitulans traictent les aultres affaires selon la ingruence et exigence des choses. Et ce fait se sonne la campane et sont convoquez tous les frères qui viennent devant le maistre et chappitre. Et les chappellains viennent en manière de procession. Et la, publicquement, sont promulguez et par le vicechancelier referiez et publiez les choses délibéreez, conclués et instituées par iceulx xvi. Laquelle publication faicte le maistre fait les rétencions acoustumées et les baillifz couventuaulx ensemble par chappitre, prieurs et [h2v] chastellain d’Emposte par les frères estans oudit chappitre, en chascune langue congreguez à part, sont esleuz et présentés au maistre. Et faicte la election les bourses et les seelz et la bannière selon l’ordre sont par le maistre restituez aux baillifz, maréchal, prieurs et aultres capitulans. Lesquelles choses complyes les chappellains qui la sont venuz processionalemnet font les oroisons en la manière que s’ensuyt. Lesquelles dictes le chappitre se clost.
(b) prieur.
(c) It follows le jour.
(d) se.
(e) dire.
(f) présentement.
Next Chappitre 2 | Back to the Contents