Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
130-Trésor 34
[g7r]
Frere Pierre d’Aubusson maistre
xxxiiii. Comme se doibt faire provision des prieurés, chastellanie d’Emposte, baillyés et commanderies vacantes par privation par deffault de payer les droitz du trésor
Il est digne et consonant à raison que ceulx qui non par amour, au moins par crainte de la peine soient reduictz à la reigle de droiturière voye. Pourtant jasoit que les contumaces es payemens des droitz du trésor faisans incourent privation, toutesfois est consonant que des bénéfices vaccans pour ceste cause provision soit faicte. Pourtant establissons que des baillies, commanderies, membres, bénéfices et dignités par contumace, inobédience et négligence des mal payans vaccans soit faicte donation, collation et provision par les prieurs, chastellain d’Emposte ou leurs lieutenans es chappitres provinciaulx, ou hors se chappitre provincial ne se célébreroit, avec le conseil de quatre commandeurs, ou de deux au moins se plus ne se trouveront, bien payans lesditz droitz ; aultres frères payans les debtes des privez préférant es commanderies de chevissement les frères couventuaulx se seront présens ou auront procureurs et payeront les debtes ; et se les frères couventuaulx seront absens soient conferies aux [g7v] commandeurs à l’instance et requisition des receveurs et procureurs du trésor ou gouverneurs dicelluy qui pour le temps seront. Toutesfoys est entendu que es provinces de poent par les prieurs et chastellain d’Emposte telle exéquution ne se peult faire contre les commandeurs et frères residens ou couvent de Rhodes durant le temps de leur résidence, car de iceulx le maistre et couvent disposeront et pourvoiront ; que soit faicte satisfaction sur les peines dessusditez.