Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
129-Trésor 33
[g6v]
Frere Pierre d’Aubusson maistre
xxxiii. De l’execution qui se doibt faire contre ceulx qui ne payent les droitz du trésor
Peu seroit instituer et faire establissemens se n’estoient mandez à execution et se la peine n’estoit donnée aux contumaces et trangresseurs. Pourtant nous(a) statuons et establissons que les prieurs, chastellain d’Emposte, baillifz, commandeurs et frères qui recuseront, contempneront ou differeront payer les droitz du trésor chascun an en chappitre provincial – ou(b) en la feste de la Nativité de Saint Jehan Baptiste se par advanture chappitre provincial ne se célébreroit – que incontinent telz debiteurs lesditz(c) chappitres provinciaulx ou ladite feste de Saint Jehan du moys de juing passés(d), sans aulcune déclaration ou promulgation de privation, soient entenduz et soient privez des prieurez et chastellanie d’Emposte, baillies, commanderies, membres, maisons, dignitez et offi-[g7r]ces sans aultre vocation, monition et citation, car le terme assigné où chappitre provincial par le chappitre général intercède pour le trésor duquel aulcun ne peult prétendre ignorance, veu la promulgation faicte oudit chappitre général ou quel ceulx qui ont l’interest ou leurs legittimes procureurs sont présens ; et encore que feussent contumaces, néantmoins par les establissemens sont obligez tenir et observer l’ordination capitulaire, car par auctorité apostolicque lesdictes impositions s’entendent estre corroborées ; et se dilation de jugemens ou appellation fust octroyée pendant ledit terme l’estat de nostre ordre cherroit en ruyne ; ne doibvent aussi estre ignorans et avoir oblivion des veuz par eulx faiz par lesquelz astraincts sont tenuz subvenir à nostre ordre et contempner, rebouter et lever toute proprieté.
(b) Missing.
(c) esditz.
(d) passé.