Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
128-Trésor 32
[g6r]
Frere Pierre d’Aubusson maistre
xxxii. Que chascun soit tenu paier les droiz du trésor quelconques soyent
[g6v] (a)Nulle chose fait tant grant dommaige, incomodité et jacture en nostre ordre que non paier à nostre commun trésor les droitz selon la qualité du temps imposez, ordonnez et instituez dont naist le nourriment des usures qui les forces, facultés et estaz affoiblist, rompt et destruict. Laquelle chose certement de quelle incomodité, detriment et jacture ayt estre le tenons en nostre mémoire. Et pourtant ou payement et satisfaction desditz droitz on doibt avec toute diligence, effort et pensée entendre, doncques désirans sur ce pourveoir decernons, statuons et establissons que tous les prieurs, chastellain d’Emposte, baillifz, commandeurs et frères, exclusés toute tardance, excusation et empeschement, reaulement et de fait chascun an en chappitre provincial que en la feste de la Nativité de Saint Jehan du moys de juing doyent et soyent tenuz payer les droitz du trésor selon le temps instituez et imposez et aussi arreraiges et tous aultres quelzconques debtes à nostre commun trésor ou recepveurs et procureurs pour le temps instituez(a).