Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
114-Trésor 18
[g4r]
Frère Jehan de Lastic maistre
xviii. De la conservation des deniers et des biens ; et du conservateur general du commun tresor
On doit avoir grant diligence à la conservation et distribution des biens de nostre commun tresor. Et pourtant nous establissons que le maistre et conseil comply doyent eslire et deputer conservateur general de nostre commun tresor ung frere preudomme, ydoine et suffisant de la langue que leur plaira, qui ayt la cure et garde de tous les deniers et biens meubles appartenans au tresor et iceulx reçoipve, conserve(a) et distribuisse selon la disposition, ordination et volunté du maistre et conseil avec le sceu et police du grant commandeur ; et se le conservateur sera frere chevalier aye cent ducatz de Rhodes pour ses gaiges, et se sera chappellain ou sergent d’armes cent florins de Rhodes courans du commun tresor, entendu faisant residence en Rhodes, et se sera envoyé es parties de ponent(b) que adonques luy soyent constituez gaiges comme semblera au maistre et conseil. Et ledit conservateur soit mué en chascun general chappitre et aultre soit subrogué. Neantmoins le successeur ne peult estre esleu de la langue du predecesseur jusques tant que soyent passés dix ans.
(b) povent.