Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
113-Trésor 17
[g3v]
Frère Jehan de Lastic maistre
xvii. Des procureurs du commun trésor
On ne peult avoir trop grant diligence, cure et vigilance à la conservation des droiz et biens de nostre commun trésor. Et pourtant, pour la utile administration diceulx biens, nous commandons et establissons que oultre le grant commandeur – qui pour raison de son office à icelluy excercice est expressement député et dicelluy ne peult estre levé(a) – le maistre et conseil avec grande attention, entretenant jurement, doyent eslire deux preudommes religieux, utilles et discretz, des baillifz et prieurs de nostre ordre estans en Rhodes, et iceulx deffaillans de baillif de chappitre ou lieutenant des baillifz conventuaulx. Desquelz l’office doit durer ung an, en la fin du quel soient tenuz de rendre compte aux autres deux qui en leur lieux seront esleuz ; en oultre à la conservation diceulx droiz et biens lesditz grant commandeur et procureurs ayent et tiennent capses utiles et biens ferreés desquelles iceulx trois chascun aye une clef ; en oultre que les biens et robes dicelluy trésor soient mises en magasins et voltes et enclos, en lieux convenables, soubz leurs [g4r] clefs, desquelz ne se face distribution se premièrement n’est escrpit es livres du trésor par l’escripvain et conservateur.