Stabilimenta Rhodiorum militum - French version
based on the printed edition Paris 1493/1495 by Pierre Le Dru
© Jyri Hasecker, Hamburg / Jürgen Sarnowsky, Hamburg (2007/2022)
102-Trésor 6
[g1r]
Frère Dieudonné de Gouzon maistre
vi. Des biens des despouilles des frères
Les biens des despouilles des frères, tant baillifz que compaignons du maistre que aultres quelzconques frères, trespassans de ça mer en levant voulons soyent distribuez en la manière cy dessoubz declarée : Premièrement, l’esglise de nostre couvent de Rhodes doye prendre desditz biens les vaisseaulx d’or ou d’argent ou dorez – c’est assavoir qui ont figure et forme de calice ordonné à dire messe ou de croix – ou petiz vaisseaulx pour mectre vin et eaue ordonnez pour service de l’aultel, aussi paremens ecclésiasticques d’or ou dorés ou de soye et utensille ecclésiasticque. Et tous les vaisseaulx d’argent et d’or ou dorez, de quelque figure que soyent, et tous les deniers, toutes les pièces de(a) draps, et tous les livres, et le froment, et grain, et toutes aultres choses des quelles les trespassés devoyent faire deniers parviengnent au commun trésor, reservé que de ceulx le maistre puist prendre attemperamment pour son us et ses compaignons, excepté des frères qui prenent soldée du trésor desquelz le maistre ne puist prendre aulcune chose, ne pour luy, ne pour ses compaignons. Et [g1v] tous le biens des despoilles du sénéchal du maistre et du chastellain de Rhodes, du bailly du commerch, du bailly de l’isle de Rhodes et tous aultres frères qui sont au service du maistre doyent parvenir au maistre à qui par droit appartiennent.